ಶಾಂತಿಯನ್ನು ಕಂಡುಕೊಳ್ಳಲು ನಿಮಗೆ ಸಹಾಯ ಮಾಡುವ ಏಳು ಪ್ರಾರ್ಥನೆಗಳು

ಅಂತರಂಗದ ಶಾಂತಿಯು ಕೆಲವೊಮ್ಮೆ ನಮಗೆ ಮರೀಚಿಕೆಯಂತೆ ಕಾಣಿಸುತ್ತದೆ. ನಮ್ಮ ಮೇಲೆ ಸದಾ ಸುರಿಯುವ ಮಾಹಿತಿ ಮತ್ತು ಮನರಂಜನೆಗಳ ಸುರಿಮಳೆ, ಅದರ ಜೊತೆಗೆ ನಾವು ನಡೆಸಬೇಕಾದ ವೇಗದ ಜೀವನದ ಒತ್ತಡಗಳು ನಮ್ಮನ್ನು ಮಾನಸಿಕ ಸಮತೋಲನದ ಅಂಚಿಗೆ ತಂದು ನಿಲ್ಲಿಸುತ್ತವೆ. ಇಂತಹ ಪರಿಸ್ಥಿತಿಯಲ್ಲಿ ನಾವು ಜೀವಿಸುತ್ತಿರುವಾಗ, ನಾವು ಪ್ರಾರ್ಥನೆ ಮಾಡುತ್ತಿದ್ದೇವೆಯೇ ಎನ್ನುವುದಕ್ಕಿಂತ, ಹೇಗೆ ಪ್ರಾರ್ಥನೆ ಮಾಡುತ್ತಿದ್ದೇವೆ ಎಂಬುದು ಬಹಳ ಮುಖ್ಯವಾಗುತ್ತದೆ.

ನಾವು ಒತ್ತಡದಲ್ಲಿದ್ದಾಗ, ನಮ್ಮ ಅಗತ್ಯಗಳ ಮತ್ತು ಆಸೆಗಳ ಪಟ್ಟಿಯನ್ನು ಹಿಡಿದು ದೇವರ ಸನ್ನಿಧಿಗೆ ಗಡಿಬಿಡಿಯಿಂದ ಓಡುವುದು ನಮ್ಮ ಸ್ವಭಾವ. ಮೊದಲು ಸಮಾಧಾನವಾಗಿ ನಿಂತು, ಕರ್ತನನ್ನು ಸ್ಮರಿಸಿ, ಆತನ ಮೇಲೆ ಗಮನವಿಡುವ ಬದಲು ನಾವು ಹೀಗೆ ಹೇಳುತ್ತೇವೆ: “ದೇವರೇ, ನನಗೆ ಇದು ಬೇಕು, ಅದು ಬೇಕು. ಇದನ್ನು ಈಗಲೇ ಮಾಡಿಕೊಡು, ನಾಳೆಗೂ ಬೇಕು. ನೀನು ನನಗಿಂತ ಮುಂಚಿತವಾಗಿಯೇ ಇದನ್ನು ಸಿದ್ಧಪಡಿಸಿಟ್ಟರೆ ಇನ್ನೂ ಒಳ್ಳೆಯದು.”

ಇದು ನಿಮಗೆ ಪರಿಚಿತವೆನಿಸುತ್ತದೆಯೇ?

ಕೀರ್ತನೆ 100:4 ಹೀಗೆ ಹೇಳುತ್ತದೆ:

“ಕೃತಜ್ಞತೆಯಿಂದ ಆತನ ಬಾಗಿಲುಗಳಲ್ಲಿಯೂ ಸ್ತೋತ್ರದೊಡನೆ ಆತನ ಅಂಗಳಗಳಲ್ಲಿಯೂ ಪ್ರವೇಶಿಸಿರಿ; ಆತನನ್ನು ಕೊಂಡಾಡಿರಿ, ಆತನ ನಾಮವನ್ನು ಸ್ತುತಿಸಿರಿ.” (ಕೀರ್ತನೆ 100:4, KANJV-BSI)

ನಾವು ಸ್ವಲ್ಪ ನಿಧಾನವಾಗಿ, ನಮ್ಮ ಪ್ರಾರ್ಥನೆಯನ್ನು ಆರಾಧನೆಯಿಂದ ಮತ್ತು ದೇವರಿಗೆ ಸಲ್ಲಿಸುವ ಕೃತಜ್ಞತೆಯಿಂದ ಆರಂಭಿಸಿದರೆ, ನಮ್ಮ ಒಳಗಿನ ಭಾವನೆಗಳಲ್ಲಿ ಒಂದು ಬದಲಾವಣೆಯಾಗುತ್ತದೆ. ನಮ್ಮ ಗಮನವು ನಮ್ಮ ಅಗತ್ಯಗಳಿಂದ ದೇವರ ಕಡೆಗೆ ತಿರುಗುತ್ತದೆ, ಆಗ ಎಲ್ಲವೂ ಸರಿಯಾದ ದೃಷ್ಟಿಕೋನದಲ್ಲಿ ಕಾಣಿಸುತ್ತದೆ. ದೇವರು ಯಾರು ಮತ್ತು ಆತನ ಮುಂದೆ ನಾವು ಎಷ್ಟು ಅಲ್ಪರು ಎಂದು ತಿಳಿದಾಗ, ನಮ್ಮ ಪ್ರಾರ್ಥನೆಯ ಸಮಯವು ಆತನೊಂದಿಗಿನ ಸಂಬಂಧವನ್ನು ಗಟ್ಟಿಗೊಳಿಸುವ ಸುಸಮಯವಾಗುತ್ತದೆ.

ನೀವು ಆಂತರಿಕ ಸಮಾಧಾನಕ್ಕಾಗಿ ಈ ಕೆಳಗಿನ ಪ್ರಾರ್ಥನೆಗಳನ್ನು ಓದುತ್ತಾ ವಿಜ್ಞಾಪಿಸುವಾಗ, ನಿಮ್ಮ ಆಲೋಚನೆಗಳು ನಿಮ್ಮ ಭಯ ಮತ್ತು ಸಂದರ್ಭಗಳಿಗಿಂತಲೂ ಮಿಗಿಲಾದ ದೇವರ ಕಡೆಗೆ ತಿರುಗಲಿ ಎಂದು ನಾನು ಪ್ರಾರ್ಥಿಸುತ್ತೇನೆ. ಆತನೇ ನಮ್ಮ ಸಮಾಧಾನ.

1. ಏನು ಮಾಡಬೇಕೆಂದು ತಿಳಿಯದಿದ್ದಾಗ ಸಮಾಧಾನಕ್ಕಾಗಿ ಪ್ರಾರ್ಥನೆ

ಕರ್ತನೇ, ನೀನು ಮಹಾ ಪರಾಕ್ರಮಶಾಲಿ. ಆದಿ ಅಂತ್ಯಗಳನ್ನು ಬಲ್ಲವನು ನೀನೇ, ಅವುಗಳ ನಡುವಿನ ಪ್ರತಿಯೊಂದು ಅಂಶವೂ ನಿನಗೆ ತಿಳಿದಿದೆ. ನನ್ನ ಹೃದಯವು ನನಗಿಂತ ನಿನಗೆ ಚೆನ್ನಾಗಿ ಗೊತ್ತು. ನನಗೆ ಅರ್ಥವಾಗದ ದೊಡ್ಡ ಚಿತ್ರಣ ಮತ್ತು ಸಣ್ಣ ವಿವರಗಳೆಲ್ಲವನ್ನೂ ನೀನು ನೋಡುತ್ತೀ. ಕರ್ತನೇ, ಈ ಪರಿಸ್ಥಿತಿಯಲ್ಲಿ ನಾನು ಏನು ಮಾಡಬೇಕೆಂದು ನನಗೆ ತಿಳಿಯುತ್ತಿಲ್ಲ. ನನಗೆ ನಿನ್ನ ಸಹಾಯದ ಅಗತ್ಯವಿದೆ. ದೇವರೇ, ನಾನು ಏನು ಮಾಡಬೇಕೆಂದು ನೀನು ಬಯಸುತ್ತೀ? ಯಾವ ನಿರ್ಧಾರವು ನಿನಗೆ ಮಹಿಮೆ ತರುತ್ತದೆ ಮತ್ತು ನನ್ನ ಸುತ್ತಲಿರುವವರಿಗೆ ಗೌರವ ತರುತ್ತದೆ? ಸ್ವಾಮಿ, ನೀನು ಜ್ಞಾನವನ್ನು ಧಾರಾಳವಾಗಿ ನೀಡುವವನಾಗಿದ್ದೀ ಎಂದು ಸ್ತೋತ್ರ. ಈ ಪರಿಸ್ಥಿತಿಗೆ ಬೇಕಾದ ನಿನ್ನ ಜ್ಞಾನವನ್ನು ನನಗೆ ದಯಪಾಲಿಸು. ನಾನು ಏನು ಮಾಡಬೇಕು ಮತ್ತು ಏನು ಮಾತನಾಡಬೇಕು ಎಂಬುದನ್ನು ತಿಳಿಯಲು ಸಹಾಯ ಮಾಡು. (ಯಾಕೋಬ 1:4; 3:15-17)

2. ಅತಿಯಾದ ಪ್ರಯತ್ನದಿಂದ ದಣಿದಾಗ ಸಮಾಧಾನಕ್ಕಾಗಿ ಪ್ರಾರ್ಥನೆ

ದೇವರೇ, ನಾನು ನಿನ್ನೊಂದಿಗೆ ನಿತ್ಯಕಾಲವೂ ಇರಬೇಕೆಂದು ನೀನು ನಿನ್ನ ಮಗನನ್ನೇ ಬಲಿ ಕೊಟ್ಟೆ. ಶಿಲುಬೆಯ ಮೇಲಿನ ಆತನ ಯಜ್ಞದಿಂದ ನನ್ನ ಪಾಪದ ಸಾಲಗಳೆಲ್ಲಾ ತೀರಿವೆ, ಈಗ ನಾನು ಕ್ರಿಸ್ತನೊಂದಿಗೆ ಜೊತೆಬಾಧ್ಯಸ್ಥನಾಗಿದ್ದೇನೆ. ನಿನ್ನ ಪ್ರೀತಿಯು ನನ್ನ ಕೆಲಸಗಳ ಮೇಲೆ ಆಧಾರವಾಗಿಲ್ಲ, ಅದು ನಿನ್ನ ಕೃಪೆಯಾಗಿದೆ. ನಾನು ನಿನ್ನನ್ನು ಪ್ರೀತಿಸುವುದಕ್ಕಿಂತ ಮುಂಚೆಯೇ ನೀನು ನನ್ನನ್ನು ಪ್ರೀತಿಸಿದ್ದಕ್ಕಾಗಿ ವಂದನೆಗಳು. ಕರ್ತನೇ, ನಾನು ಎಲ್ಲರಿಗಾಗಿ ಎಲ್ಲವನ್ನೂ ಮಾಡಲು ಹೋಗಿ ಮಿತಿ ಮೀರಿ ಕೆಲಸ ಮಾಡಿ ದಣಿದಿದ್ದೇನೆ. ನಿನ್ನ ಮೇಲೆ ಆತುಕೊಳ್ಳುವ ಬದಲು ನನ್ನ ಸ್ವಂತ ಶಕ್ತಿಯಿಂದಲೇ ನಿನ್ನನ್ನು ಮೆಚ್ಚಿಸಲು ಪ್ರಯತ್ನಿಸಿದೆ. ದೇವರೆ, ನಾನು ದಣಿದು ಹೋಗಿದ್ದೇನೆ. ನಿನ್ನಲ್ಲಿ ವಿಶ್ರಾಂತಿ ಪಡೆಯಲು ಬಯಸುತ್ತೇನೆ. ಇಂದು ನಾನು ಮಾಡಬೇಕಾದ ಕೆಲಸದಲ್ಲಿ ನೀನೇ ನನ್ನನ್ನು ನಡೆಸು. ನಿನ್ನ ಸನ್ನಿಧಿಯಿಲ್ಲದೆ ನಾನು ಒಂದು ಹೆಜ್ಜೆಯನ್ನೂ ಇಡಲಾರೆ. ನಾನು ಪ್ರತಿ ಕ್ಷಣವೂ ನಿನ್ನನ್ನು ಅವಲಂಬಿಸಿದ್ದೇನೆ. ಯೇಸು ಸ್ವಾಮಿಯನ್ನು ನನ್ನ ರಕ್ಷಕನನ್ನಾಗಿ ಮಾತ್ರವಲ್ಲದೆ, ಆಪ್ತ ಸಲಹೆಗಾರನನ್ನಾಗಿ, ಸ್ನೇಹಿತನನ್ನಾಗಿ ಮತ್ತು ಮಾರ್ಗದರ್ಶಕನನ್ನಾಗಿ ನೀಡಿದ್ದಕ್ಕಾಗಿ ವಂದನೆಗಳು. ಜೀವನದ ಈ ಪಯಣದಲ್ಲಿ ನಾನು ಒಬ್ಬಂಟಿಯಲ್ಲ ಎಂಬ ಅರಿವಿನಲ್ಲಿ ನಾನು ವಿಶ್ರಮಿಸುತ್ತೇನೆ. (ಎಫೆಸದವರಿಗೆ 2:8-9; ಮತ್ತಾಯ 11:28-30)

3. ನಿಮ್ಮ ಮೌಲ್ಯದ ಬಗ್ಗೆ ಸಂಶಯ ಬಂದಾಗ ಸಮಾಧಾನಕ್ಕಾಗಿ ಪ್ರಾರ್ಥನೆ

ಕರ್ತನೇ, ನೀನು ನನ್ನ ತಂದೆ, ನಾನು ನಿನ್ನ ಮಗು. ಸತ್ಯವೇದವು ಹೀಗೆ ಹೇಳುತ್ತದೆ:

“ನೀನು ನನ್ನನ್ನು ಭಯಂಕರವಾಗಿಯೂ ಅದ್ಭುತವಾಗಿಯೂ ನಿರ್ಮಿಸಿದ್ದರಿಂದ ನಾನು ನಿನ್ನನ್ನು ಸ್ತುತಿಸುತ್ತೇನೆ; ನಿನ್ನ ಕೃತ್ಯಗಳು ಆಶ್ಚರ್ಯವಾಗಿವೆ ಎಂದು ನನ್ನ ಪ್ರಾಣಕ್ಕೆ ಚೆನ್ನಾಗಿ ತಿಳಿದಿದೆ.” (ಕೀರ್ತನೆ 139:14, KANJV-BSI)

ನನ್ನ ಆಲೋಚನೆಗಳು ನನಗಿಂತ ಮುಂಚೆಯೇ ನಿನಗೆ ತಿಳಿಯುತ್ತವೆ. ನನ್ನ ತಲೆಯ ಕೂದಲನ್ನೆಲ್ಲಾ ನೀನು ಎಣಿಸಿದ್ದೀ. ನಿನ್ನ ವಾಕ್ಯದ ಮೂಲಕ ನೀನು ನನ್ನನ್ನು ನೀತಿವಂತನೆಂದೂ ಪರಿಶುದ್ಧನೆಂದೂ ಕರೆಯುತ್ತೀ. ನಾನು ಬೆಲೆಯಿಲ್ಲದವನು ಮತ್ತು ಆತಂಕದಿಂದ ಇದ್ದೇನೆ ಎಂದು ನನಗೆ ಅನಿಸುತ್ತಿದೆ, ಆದರೆ ನಾನು ಅಮೂಲ್ಯನು ಎಂದು ನೀನು ಹೇಳುತ್ತೀ. ನಿನ್ನ ಮಗನು ನನಗಾಗಿ ಸತ್ತಾಗಲೇ ನೀನು ನಿನ್ನ ಪ್ರೀತಿಯನ್ನು ಸಾಬೀತುಪಡಿಸಿದ್ದೀ. ದೇವರೆ, ನನ್ನ ಹೃದಯವನ್ನು ಸ್ಥಿರಗೊಳಿಸು. ನನ್ನ ಗುರುತು ನಿನ್ನಲ್ಲಿದೆ ಮತ್ತು ನೀನು ಯಾವಾಗಲೂ ನನ್ನೊಂದಿಗಿದ್ದೀ ಎಂಬ ಧೈರ್ಯದಲ್ಲಿ ನಾನು ದೃಢವಾಗಿ ನಿಲ್ಲುವಂತೆ ಮಾಡು. ಗ್ರಹಿಕೆಗೆ ಮೀರಿದ ನಿನ್ನ ಸಮಾಧಾನಕ್ಕಾಗಿ ವಂದನೆಗಳು. ಈ ಸತ್ಯದ ಹಾದಿಯಲ್ಲಿ ನಡೆಯಲು ಇಂದು ನನಗೆ ಸಹಾಯ ಮಾಡು. (ಕೀರ್ತನೆ 139:14; ಮತ್ತಾಯ 10:29-31; ಇಬ್ರಿಯರಿಗೆ 10:35)

4. ಕೆಲಸಗಳ ಪಟ್ಟಿ ಹೆಚ್ಚಾದಾಗ ಸಮಾಧಾನಕ್ಕಾಗಿ ಪ್ರಾರ್ಥನೆ

ದೇವರೇ, ನೀನು ಪರಿಶುದ್ಧನೂ ಕೃಪಾಪೂರ್ಣನೂ ಆಗಿದ್ದೀ. ನೀನೇ ನನ್ನ ಪಾಲಕನು. ನೀನು ನನ್ನ ಜೀವನಕ್ಕೆ ಅರ್ಥ ಮತ್ತು ಕ್ರಮವನ್ನು ನೀಡುತ್ತೀ. ನಾನು ಇಂದು ಪೂರೈಸಬೇಕಾದ ಎಲ್ಲಾ ಕೆಲಸಗಳು ನಿನಗೆ ತಿಳಿದಿವೆ. ಕರ್ತನೇ, ನಾನು ನನ್ನ ದಿನವನ್ನು ನಿನ್ನೊಂದಿಗೆ ಆರಂಭಿಸಿ ನಿನ್ನೊಂದಿಗೇ ಮುಗಿಸಲು ಬಯಸುತ್ತೇನೆ—ನಿನ್ನ ಸನ್ನಿಧಿಯಲ್ಲಿ ಸುಮ್ಮನಿರಲು ಬಯಸುತ್ತೇನೆ. ಯಾವುದು ತುರ್ತಾಗಿ ಮಾಡಬೇಕು ಮತ್ತು ಯಾವುದು ನಿಜವಾಗಿಯೂ ಮುಖ್ಯ ಎಂಬುದನ್ನು ಗುರುತಿಸುವ ಜ್ಞಾನವನ್ನು ನನಗೆ ನೀಡು. ನೀನು ನನಗೆ ನೇಮಿಸಿದ ಕೆಲಸವನ್ನು ಮಾಡಲು ಬೇಕಾದ ಶಕ್ತಿಯನ್ನು ನೀನೇ ನೀಡುತ್ತೀ ಎಂದು ನಂಬುತ್ತೇನೆ. ನಾನು ಸ್ವಲ್ಪ ಹೊತ್ತು ನಿಂತು, ಸುಮ್ಮನಿದ್ದು, ನಿನ್ನ ಸನ್ನಿಧಿಯಲ್ಲಿ ನೆಲೆಸಲು ಮತ್ತು ನಿನ್ನ ಶಾಂತಿಯಲ್ಲಿ ವಿಶ್ರಾಂತಿ ಪಡೆಯಲು ನನಗೆ ಸಹಾಯ ಮಾಡು.

“ಸುಮ್ಮನಿರ್ರಿ, ನಾನೇ ದೇವರೆಂದು ತಿಳಿದುಕೊಳ್ಳಿರಿ; ಜನಾಂಗಗಳಲ್ಲಿ ಉನ್ನತನಾಗುವೆನು, ಲೋಕದಲ್ಲಿ ಉನ್ನತನಾಗುವೆನು.” (ಕೀರ್ತನೆ 46:10, KANJV-BSI) (ಕೀರ್ತನೆ 46:10; ಮತ್ತಾಯ 6:25-34)

5. ಅತಿಯಾದ ಒತ್ತಡ ಉಂಟಾದಾಗ ಸಮಾಧಾನಕ್ಕಾಗಿ ಪ್ರಾರ್ಥನೆ

ದೇವರೇ, ನೀನೇ ನನ್ನ ಬಂಡೆ, ನನ್ನ ಆಧಾರ ಮತ್ತು ನನ್ನ ಬಲವಾದ ಕೋಟೆ. ಕರ್ತನೇ, ಈಗ ಎಲ್ಲವೂ ಕೈತಪ್ಪಿ ಹೋಗುತ್ತಿದೆ ಎಂದು ನನಗೆ ಅನಿಸುತ್ತಿದೆ. ನನಗೆ ಅತಿಯಾದ ಒತ್ತಡವಾಗುತ್ತಿದೆ, ಆದರೆ ನೀನು ನನ್ನೊಂದಿಗಿದ್ದೀ ಎಂದು ನನಗೆ ತಿಳಿದಿದೆ. ನಾನು ಶಾಂತವಾಗಿರಲು ಸಹಾಯ ಮಾಡು. ದೇವರೆ, ನನ್ನ ಹೃದಯವನ್ನು ಮತ್ತು ಮನಸ್ಸನ್ನು ಸ್ಥಿರಗೊಳಿಸು. ಭಯದಿಂದ ನಾನು ನಿರ್ಧಾರಗಳನ್ನು ತೆಗೆದುಕೊಳ್ಳಬಾರದು, ಬದಲಾಗಿ ನಿನ್ನ ಪ್ರೀತಿಯ ಭರವಸೆಯಿಂದ ನಿರ್ಧಾರ ತೆಗೆದುಕೊಳ್ಳುವಂತೆ ಮಾಡು. ನನಗಿಂತಲೂ ಎತ್ತರವಾಗಿರುವ ಬಂಡೆಯ ಕಡೆಗೆ ನನ್ನನ್ನು ನಡೆಸು.

“ನೀನು ನನ್ನನ್ನು ಹಿಂದೆಯೂ ಮುಂದೆಯೂ ಆವರಿಸಿಕೊಂಡಿದ್ದೀ; ನಿನ್ನ ಕೈಯನ್ನು ನನ್ನ ಮೇಲಿಟ್ಟಿದ್ದೀ.” (ಕೀರ್ತನೆ 139:5, KANJV-BSI) ನೀನು ನೀಡುವ ಆಶ್ರಯದಲ್ಲಿ ನಾನು ನಂಬಿಕೆಯಿಡುತ್ತೇನೆ—ನೀನೇ ನನ್ನ ಶರಣನು. ನಾನು ನಿನ್ನಲ್ಲಿ ಭರವಸೆಯಿಡುತ್ತೇನೆ. (ಕೀರ್ತನೆ 61; ಕೀರ್ತನೆ 139:5)

6. ಪ್ರಿಯರು ನೋವಿನಲ್ಲಿದ್ದಾಗ ಅಥವಾ ಸಂಕಷ್ಟದಲ್ಲಿದ್ದಾಗ ಸಮಾಧಾನಕ್ಕಾಗಿ ಪ್ರಾರ್ಥನೆ

ದೇವರೇ, ನಿನ್ನನ್ನು ಪ್ರೀತಿಸುವವರ ಒಳಿತಿಗಾಗಿ ನೀನು ಎಲ್ಲವನ್ನೂ ಒಟ್ಟಾಗಿ ನಡೆಸುತ್ತೀ ಎಂದು ನನಗೆ ತಿಳಿದಿದೆ. ನೋವು ಮತ್ತು ಕಷ್ಟಗಳನ್ನು ನೀನು ನಮ್ಮನ್ನು ಪವಿತ್ರಗೊಳಿಸಲು ಮತ್ತು ನಿನ್ನ ಹೋಲಿಕೆಗೆ ತರಲು ಬಳಸುತ್ತೀ ಎಂದು ನಾನು ನಂಬುತ್ತೇನೆ. ದೇವರೆ, ನೀನು ಎಲ್ಲವನ್ನೂ ಆಯಾ ಕಾಲದಲ್ಲಿ ಸುಂದರವಾಗಿಸುತ್ತೀ. ಈಗ ನನ್ನ ಜೀವನದಲ್ಲಿರುವ ಈ ವ್ಯಕ್ತಿಯ ಬಗ್ಗೆ ನನಗೆ ಚಿಂತೆಯಾಗುತ್ತಿದೆ. ಅವರು ತಮ್ಮ ನೋವು ಮತ್ತು ಸಂಕಷ್ಟದ ಸಮಯದಲ್ಲಿ ಲೋಕದ ಕಡೆಗೆ ನೋಡದೆ, ನಿನ್ನ ಕಡೆಗೆ ತಿರುಗಲಿ ಎಂದು ಪ್ರಾರ್ಥಿಸುತ್ತೇನೆ. ಅವರ ಬಗ್ಗೆ ನನಗಿರುವ ಎಲ್ಲಾ ಚಿಂತೆಗಳನ್ನು ನಾನು ನಿನ್ನ ಪಾದಗಳ ಬಳಿ ಇಡುತ್ತೇನೆ. ಅವರನ್ನು ಹೊತ್ತುಕೊಳ್ಳುತ್ತೇನೆ ಎಂಬ ನಿನ್ನ ವಾಗ್ದಾನಕ್ಕಾಗಿ ಸ್ತೋತ್ರ. ನೀನು ಪರಮ ವೈದ್ಯನಾಗಿದ್ದೀ ಮತ್ತು ನಮ್ಮ ಆಳವಾದ ಗಾಯಗಳನ್ನು ವಾಸಿ ಮಾಡುತ್ತೀ ಎಂದು ನಂಬುತ್ತೇನೆ. (ರೋಮಾಪುರದವರಿಗೆ 5:3-5; 8:28; ಯೆಶಾಯ 43:18-19; ಕೀರ್ತನೆ 55:22)

7. ನಿರಾಶೆಯಾದಾಗ ಸಮಾಧಾನಕ್ಕಾಗಿ ಪ್ರಾರ್ಥನೆ

ದೇವರೇ, ನನ್ನ ನಿರೀಕ್ಷೆಯು ನಿನ್ನಲ್ಲಿದೆ. ನಾನು ಕೂಗುವಾಗ ನೀನು ನನಗೆ ಉತ್ತರ ನೀಡುತ್ತೀ. ಜನರು ನನ್ನ ಬಗ್ಗೆ ಏನು ಹೇಳಿದರೂ, ನನ್ನ ಅಥವಾ ನನ್ನ ಪರಿಸ್ಥಿತಿಯ ಬಗ್ಗೆ ನನಗೆ ಏನೇ ಅನಿಸಿದರೂ, ನೀನು ನನ್ನ ಗುರಾಣಿಯೂ ರಕ್ಷಕನೂ ಆಗಿದ್ದೀ ಎಂದು ನನಗೆ ತಿಳಿದಿದೆ. ನಿನ್ನ ಮೇಲಿರುವ ನನ್ನ ನಿರೀಕ್ಷೆಯನ್ನು ಬಲಪಡಿಸು. ನೀನು ಈ ಹಿಂದೆ ನನಗೆ ತೋರಿಸಿದ ನಂಬಿಗಸ್ತಿಕೆಯನ್ನು ನೆನಪಿಸಿಕೊಳ್ಳುವಾಗ, ನಿನ್ನ ಒಳ್ಳೆಯತನ ಮತ್ತು ಶ್ರೇಷ್ಠತೆಯು ನನಗೆ ನೆನಪಾಗುತ್ತದೆ. ನನ್ನನ್ನು ಆಶೀರ್ವದಿಸಿ ಕಾಯುತ್ತಿರುವುದಕ್ಕಾಗಿ ವಂದನೆಗಳು. ನೀನು ಏನು ಮಾಡುತ್ತಿದ್ದೀ ಎಂದು ಈಗ ನನಗೆ ಕಾಣಿಸದಿರಬಹುದು, ಆದರೆ ನೀನು ಕಾರ್ಯ ಮಾಡುವವರೆಗೆ ನಾನು ತಾಳ್ಮೆಯಿಂದ ಕಾಯುತ್ತೇನೆ. ನನ್ನ ನಿರೀಕ್ಷೆಯೂ ಭರವಸೆಯೂ ನಿನ್ನಲ್ಲಿದೆ. (ಕೀರ್ತನೆ 3:2-6; 71:14; ರೋಮಾಪುರದವರಿಗೆ 8:24-25; 1 ಪೇತ್ರ 5:6-7)