ಒಂದು ದಿನ… ಲಕ್ಷಾಂತರ ಜನರು ಇದ್ದಕ್ಕಿದ್ದಂತೆ ಕಾಣೆಯಾಗಿಬಿಟ್ಟರೆ? | ಬೈಬಲ್ ಏನು ಹೇಳುತ್ತದೆ?

ಒಂದು ಪ್ರಶ್ನೆ… ಇಡೀ ಜಗತ್ತನ್ನೇ ಯೋಚಿಸುವಂತೆ ಮಾಡುವ ಪ್ರಶ್ನೆ

“ಇದು ಭಯ ಹುಟ್ಟಿಸುವ ಲೇಖನವಲ್ಲ. ಬೈಬಲ್ ನಮಗೆ ನೀಡುವ ನಿರೀಕ್ಷೆಯ ಬಗ್ಗೆ ಒಂದು ಸರಳ ಮಾತುಕತೆ.”

ಬೆಳಗ್ಗೆ…

ನೀವು ಎಂದಿನಂತೆ ಬೆಳಿಗ್ಗೆ ಎದ್ದೇಳುತ್ತೀರಿ. ಮನೆಯ ಮುಂದೆ ಹಾಲಿನ ಪ್ಯಾಕೆಟ್ ಬಿದ್ದಿದೆ. ಮಕ್ಕಳು ಶಾಲೆಗೆ ಹೋಗಲು ಸಿದ್ಧರಾಗುತ್ತಿದ್ದಾರೆ. ಕಚೇರಿಗೆ ಹೋಗುವವರು ತುರ್ತಿನಲ್ಲಿ ಓಡಾಡುತ್ತಿದ್ದಾರೆ.

ಬಸ್ ನಿಲ್ದಾಣದಲ್ಲಿ ಜನರು ಕಾಯುತ್ತಿದ್ದಾರೆ. ಅಂಗಡಿಗಳು ಬಾಗಿಲು ತೆರೆಯುತ್ತಿವೆ. ಎಲ್ಲವೂ ಎಂದಿನಂತೆಯೇ ಇದೆ.

ಆದರೆ…

ಕೆಲವೇ ಕ್ಷಣಗಳಲ್ಲಿ ಜಗತ್ತಿನಾದ್ಯಂತ ವಿಚಿತ್ರ ಸುದ್ದಿಗಳು ಹರಡಲು ಆರಂಭವಾಗುತ್ತವೆ. ಕೆಲವು ಮನೆಗಳಲ್ಲಿ ಕುಟುಂಬದ ಸದಸ್ಯರು ಇದ್ದಕ್ಕಿದ್ದಂತೆ ಕಾಣೆಯಾಗಿದ್ದಾರೆ. ಒಬ್ಬ ತಾಯಿ ತನ್ನ ಮಗನನ್ನು ಹುಡುಕುತ್ತಿದ್ದಾಳೆ.

ಒಬ್ಬ ಪತಿ ತನ್ನ ಹೆಂಡತಿಗೆ ಕರೆ ಮಾಡುತ್ತಿದ್ದಾನೆ. ಉತ್ತರವೇ ಇಲ್ಲ. ಒಂದು ಶಾಲೆಯಲ್ಲಿ ಕೆಲವು ಮಕ್ಕಳು ಕಾಣೆಯಾಗಿದ್ದಾರೆ ಎಂದು ಸುದ್ದಿ ಬರುತ್ತದೆ. ವಿಮಾನ ನಿಲ್ದಾಣಗಳಲ್ಲಿ ಗೊಂದಲ. ಆಸ್ಪತ್ರೆಗಳಲ್ಲಿ ಆತಂಕ.

ಸಾಮಾಜಿಕ ಜಾಲತಾಣಗಳಲ್ಲಿ ಸಾವಿರಾರು ಊಹಾಪೋಹಗಳು.

“ಇದು ಯಾವುದೋ ವೈಜ್ಞಾನಿಕ ಪ್ರಯೋಗವೇ?”

“ಭೂಮಿಗೆ ಅನ್ಯಗ್ರಹ ಜೀವಿಗಳು ಬಂದಿವೆಯೇ?”

“ಹೊಸ ವೈರಸ್‌ನ ಪರಿಣಾಮವೇ?”

“ಅಥವಾ ಜಗತ್ತಿನ ಇತಿಹಾಸದಲ್ಲೇ ನಡೆದಿರದ ಯಾವುದೋ ಘಟನೆ?”

ಇಂತಹ ಪ್ರಶ್ನೆಗಳು ಒಂದೇ ಕ್ಷಣದಲ್ಲಿ ಎಲ್ಲರ ಮನಸ್ಸಿನಲ್ಲಿ ಮೂಡುತ್ತವೆ. ಇದು ಕೇವಲ ಒಂದು ಕಲ್ಪನೆ. ಆದರೆ… ಇಂತಹ ಒಂದು ಘಟನೆಯ ಬಗ್ಗೆ ಸುಮಾರು ಎರಡು ಸಾವಿರ ವರ್ಷಗಳ ಹಿಂದೆಯೇ ಬೈಬಲ್ ಹೇಳಿದೆ ಎಂದು ಕ್ರೈಸ್ತರು ನಂಬುತ್ತಾರೆ.

ಆ ಘಟನೆಗೆ ಇಂಗ್ಲಿಷಿನಲ್ಲಿ “Rapture” ಎಂದು ಕರೆಯುತ್ತಾರೆ. ಕನ್ನಡದಲ್ಲಿ ಕೆಲವರು ಇದನ್ನು “ಎತ್ತಲ್ಪಡುವಿಕೆ”, “ಕರ್ತನನ್ನು ಎದುರುಗೊಳ್ಳಲು ಮೇಲಕ್ಕೆ ಸೇರಿಸಲ್ಪಡುವುದು”, ಅಥವಾ ಸರಳವಾಗಿ “ರಾಪ್ಚರ್” ಎಂದೇ ಕರೆಯುತ್ತಾರೆ.

ಆದರೆ… ಇದು ನಿಜವಾಗಿ ಏನು?

ಮನುಷ್ಯನ ಮನಸ್ಸಿನಲ್ಲಿ ಯಾವಾಗಲೂ ಒಂದೇ ಪ್ರಶ್ನೆ?

ನಾವು ಯಾವ ಧರ್ಮದವರೇ ಆಗಿರಲಿ, ಯಾವ ದೇಶದವರೇ ಆಗಿರಲಿ, ಒಂದು ಪ್ರಶ್ನೆ ಮಾತ್ರ ಎಲ್ಲರನ್ನೂ ಒಂದೇ ರೀತಿಯಲ್ಲಿ ಯೋಚಿಸುವಂತೆ ಮಾಡುತ್ತದೆ.

“ಈ ಜಗತ್ತು ಹೀಗೆಯೇ ಮುಂದುವರಿಯುತ್ತದೆಯೇ?” ಯುದ್ಧಗಳು… ಪ್ರಕೃತಿ ವಿಕೋಪಗಳು… ರೋಗಗಳು… ಅನ್ಯಾಯ… ಮನುಷ್ಯ ಮನುಷ್ಯನನ್ನೇ ದ್ವೇಷಿಸುವ ಪರಿಸ್ಥಿತಿ… ಇವೆಲ್ಲವನ್ನು ನೋಡಿದಾಗ ಅನೇಕರು ಕೇಳುವ ಪ್ರಶ್ನೆ ಇದೇ.

“ಇದಕ್ಕೆ ಯಾವಾಗ ಅಂತ್ಯ?” ಇದು ಹೊಸ ಪ್ರಶ್ನೆಯಲ್ಲ. ಸಾವಿರಾರು ವರ್ಷಗಳಿಂದ ಮನುಷ್ಯ ಇದೇ ಪ್ರಶ್ನೆಯನ್ನು ಕೇಳುತ್ತಿದ್ದಾನೆ.

ಪ್ರಪಂಚದ ವಿವಿಧ ಧರ್ಮಗಳು ಮತ್ತು ಸಂಪ್ರದಾಯಗಳು ಕೂಡ ಒಂದು ದಿನ ನ್ಯಾಯ ವಿಚಾರಣೆ ನಡೆಯುತ್ತದೆ, ಮನುಷ್ಯ ತನ್ನ ಕೃತ್ಯಗಳಿಗೆ ಉತ್ತರ ಕೊಡಬೇಕಾಗುತ್ತದೆ, ಮತ್ತು ಇತಿಹಾಸಕ್ಕೆ ಒಂದು ಅಂತಿಮ ಅಧ್ಯಾಯ ಇದೆ ಎಂದು ವಿವಿಧ ರೀತಿಯಲ್ಲಿ ಬೋಧಿಸುತ್ತವೆ.

ಆದರೆ…

ಬೈಬಲ್ ಈ ವಿಷಯವನ್ನು ವಿಶಿಷ್ಟ ರೀತಿಯಲ್ಲಿ ವಿವರಿಸುತ್ತದೆ. ಬೈಬಲ್ ಹೇಳುವ ಅಂತಿಮ ಘಟನೆಗಳು ಕೇವಲ ಜಗತ್ತಿನ ಅಂತ್ಯದ ಬಗ್ಗೆ ಮಾತ್ರವಲ್ಲ. ಅವು ಒಂದು ಭರವಸೆಯ ಕಥೆ. ಒಂದು ವಾಗ್ದಾನದ ಕಥೆ. ಒಂದು ಮರಳಿಬರುವ ರಾಜನ ಕಥೆ.

ಯೇಸು ಕೊಟ್ಟ ಒಂದು ವಾಗ್ದಾನ

ಒಮ್ಮೆ ಯೇಸು ತನ್ನ ಶಿಷ್ಯರೊಂದಿಗೆ ಮಾತನಾಡುತ್ತಿದ್ದನು. ಆಗ ಆತನು ಅವರಿಗೆ ಒಂದು ಭರವಸೆ ಕೊಟ್ಟನು. 

“ನನ್ನ ತಂದೆಯ ಮನೆಯಲ್ಲಿ ಬಹಳ ಬಿಡಾರಗಳು ಅವೆ; ಇಲ್ಲದಿದ್ದರೆ ನಿಮಗೆ ಹೇಳುತ್ತಿದ್ದೆನು; ನಿಮಗೆ ಸ್ಥಳವನ್ನು ಸಿದ್ಧಮಾಡುವದಕ್ಕೆ ಹೋಗುತ್ತೇನಲ್ಲಾ. ನಾನು ಹೋಗಿ ನಿಮಗೆ ಸ್ಥಳವನ್ನು ಸಿದ್ಧಮಾಡಿದ ಮೇಲೆ ತಿರಿಗಿ ಬಂದು ನಿಮ್ಮನ್ನು ಕರಕೊಂಡು ಹೋಗಿ ನನ್ನ ಬಳಿಗೆ ಸೇರಿಸಿಕೊಳ್ಳುವೆನು;

ಯಾಕಂದರೆ ನಾನಿರುವ ಸ್ಥಳದಲ್ಲಿ ನೀವು ಸಹ ಇರಬೇಕು.” (ಯೋಹಾನ 14:2–3)

ಈ ಮಾತುಗಳನ್ನು ಕೇಳಿದ ಶಿಷ್ಯರು ದುಃಖದಲ್ಲಿದ್ದರು. ಯಾಕೆಂದರೆ ಯೇಸು ಅವರನ್ನು ಬಿಟ್ಟು ಹೋಗಲಿದ್ದನು.

ಆದರೆ ಯೇಸು ಒಂದು ವಿಷಯವನ್ನು ಸ್ಪಷ್ಟವಾಗಿ ಹೇಳಿದನು. “ನಾನು ಹೋಗುತ್ತಿದ್ದೇನೆ. ಆದರೆ ನಿಮ್ಮನ್ನು ಬಿಟ್ಟುಬಿಡುವುದಿಲ್ಲ.

ಮತ್ತೆ ಬರುತ್ತೇನೆ.” ಕ್ರೈಸ್ತ ನಂಬಿಕೆಯ ಹೃದಯದಲ್ಲಿರುವ ದೊಡ್ಡ ನಿರೀಕ್ಷೆ ಇದೇ. ಯೇಸು ಕೇವಲ ಈ ಲೋಕಕ್ಕೆ ಬಂದನು ಎಂಬುದಲ್ಲ. ಅವನು ಮತ್ತೆ ಬರುತ್ತಾನೆ.

“ರಾಪ್ಚರ್” ಎಂಬ ಪದ ಬೈಬಲಿನಲ್ಲಿದೆಯೇ?

ಇದು ಅನೇಕರು ಕೇಳುವ ಪ್ರಶ್ನೆ. ಉತ್ತರವನ್ನು ಪ್ರಾಮಾಣಿಕವಾಗಿ ಹೇಳಬೇಕಾದರೆ… “ರಾಪ್ಚರ್” ಎಂಬ ಇಂಗ್ಲಿಷ್ ಪದ ಬೈಬಲಿನಲ್ಲಿ ಕಾಣಿಸುವುದಿಲ್ಲ.

ಹಾಗಾದರೆ ಈ ಪದ ಎಲ್ಲಿಂದ ಬಂತು? ಹೊಸ ಒಡಂಬಡಿಕೆಯನ್ನು ಮೂಲತಃ ಗ್ರೀಕ್ ಭಾಷೆಯಲ್ಲಿ ಬರೆಯಲಾಗಿದೆ. ಅಲ್ಲಿ “ಹರ್ಪಾಜೋ” (Harpazo) ಎಂಬ ಪದವನ್ನು ಬಳಸಲಾಗಿದೆ.

ಅದರ ಅರ್ಥ:

• ಹಿಡಿದುಕೊಳ್ಳುವುದು,
• ಮೇಲಕ್ಕೆ ಎತ್ತಿಕೊಳ್ಳುವುದು,
• ತನ್ನ ಬಳಿಗೆ ಸೇರಿಸಿಕೊಳ್ಳುವುದು.

ನಂತರ ಬೈಬಲ್ ಲ್ಯಾಟಿನ್ ಭಾಷೆಗೆ ಅನುವಾದವಾದಾಗ ಈ ಪದವನ್ನು “ರಾಪ್ಟುರೊ” ಎಂದು ಅನುವಾದಿಸಲಾಯಿತು. ಅಲ್ಲಿಂದಲೇ “Rapture” ಎಂಬ ಪದ ಬಳಕೆಗೆ ಬಂತು.

ಆದ್ದರಿಂದ…

ಪದ ಬೈಬಲಿನಲ್ಲಿ ಇರದಿದ್ದರೂ, ಅದು ಸೂಚಿಸುವ ಘಟನೆ ಬೈಬಲಿನಲ್ಲಿ ಸ್ಪಷ್ಟವಾಗಿ ಇದೆ. ಹಾಗೆಯೇ “ತ್ರೈಯೇಕ ದೇವರು” ಎಂಬ ಪದ ಬೈಬಲಿನಲ್ಲಿ ಕಾಣಿಸುವುದಿಲ್ಲ.

ಆದರೆ ತಂದೆ, ಮಗ ಮತ್ತು ಪವಿತ್ರಾತ್ಮನ ಬಗ್ಗೆ ಬೈಬಲ್ ಸ್ಪಷ್ಟವಾಗಿ ಬೋಧಿಸುತ್ತದೆ. ಅದೇ ರೀತಿಯಲ್ಲಿ, “ರಾಪ್ಚರ್” ಎಂಬುದು ಬೈಬಲ್ ವಿವರಿಸುವ ಒಂದು ಘಟನೆಯನ್ನು ಸೂಚಿಸಲು ಬಳಸುವ ಪದವಾಗಿದೆ.

ಏಕೆ ಈ ವಿಷಯದ ಬಗ್ಗೆ ತಿಳಿದುಕೊಳ್ಳಬೇಕು?

ಕೆಲವರು ಹೇಳುತ್ತಾರೆ:

“ಇಂತಹ ವಿಷಯಗಳನ್ನು ತಿಳಿದುಕೊಂಡು ಏನು ಪ್ರಯೋಜನ?” ಇನ್ನೂ ಕೆಲವರು ಹೇಳುತ್ತಾರೆ: “ಒಳ್ಳೆಯವನಾಗಿ ಬದುಕಿದರೆ ಸಾಕಲ್ಲವೇ?” ಇದು ಒಳ್ಳೆಯ ಪ್ರಶ್ನೆ. ಆದರೆ ಬೈಬಲ್ ಈ ವಿಷಯವನ್ನು ಕುತೂಹಲಕ್ಕಾಗಿ ಹೇಳುವುದಿಲ್ಲ. ಜನರನ್ನು ಹೆದರಿಸಲು ಕೂಡ ಹೇಳುವುದಿಲ್ಲ.

ಅಪೋಸ್ತಲನಾದ ಪೌಲನು ಈ ವಿಷಯವನ್ನು ಬರೆದ ನಂತರ ಹೀಗೆ ಹೇಳುತ್ತಾನೆ:

“ಆದಕಾರಣ ಈ ಮಾತುಗಳಿಂದ ಒಬ್ಬರನ್ನೊಬ್ಬರು ಸಂತೈಸಿರಿ.” (1 ಥೆಸಲೊನೀಕದವರಿಗೆ 4:18) ಗಮನಿಸಿ. ಈ ಬೋಧನೆಯ ಉದ್ದೇಶ ಭಯವಲ್ಲ. ಸಮಾಧಾನ. ನಿರೀಕ್ಷೆ. ಧೈರ್ಯ. ಅಂದರೆ, ಯೇಸುವನ್ನು ನಂಬುವವರಿಗೆ ಮರಣವೇ ಕೊನೆಯ ಮಾತಲ್ಲ.

ಇತಿಹಾಸವೂ ಕೊನೆಯ ಮಾತಲ್ಲ. ಕೊನೆಯ ಮಾತು ದೇವರದೇ. ಅದೇ ಕಾರಣಕ್ಕೆ ರಾಪ್ಚರ್ ಕುರಿತು ಬೈಬಲ್ ಹೇಳುವ ವಿಷಯವನ್ನು ಅರ್ಥಮಾಡಿಕೊಳ್ಳುವುದು ಮುಖ್ಯ.

ಎತ್ತಲ್ಪಡುವಿಕೆ ಎಂದರೆ ನಿಜವಾಗಿ ಏನು? ಬೈಬಲ್ ಏನು ಹೇಳುತ್ತದೆ?

ಹಿಂದಿನ ಭಾಗದಲ್ಲಿ ನಾವು ಒಂದು ಪ್ರಶ್ನೆಯೊಂದಿಗೆ ನಿಲ್ಲಿಸಿದ್ದೆವು. “ರಾಪ್ಚರ್ ಎಂದರೆ ನಿಜವಾಗಿ ಏನು?” ಇದು ಕೇವಲ ಒಂದು ಧಾರ್ಮಿಕ ಕಲ್ಪನೆಯೇ? ಅಥವಾ ಬೈಬಲ್ ಸ್ಪಷ್ಟವಾಗಿ ಬೋಧಿಸುವ ಘಟನೆಯೇ?

ಈ ಪ್ರಶ್ನೆಗೆ ಉತ್ತರ ತಿಳಿಯಬೇಕಾದರೆ, ನಾವು ಊಹೆಗಳನ್ನು ಬದಿಗಿಟ್ಟು ನೇರವಾಗಿ ಬೈಬಲ್ ಏನು ಹೇಳುತ್ತದೆ ಎಂಬುದನ್ನು ನೋಡಬೇಕು.

ರಾಪ್ಚರ್… ಒಂದು ದಿನದಲ್ಲಿ ಹುಟ್ಟಿದ ಬೋಧನೆಯಲ್ಲ

ಕೆಲವರ ಅಭಿಪ್ರಾಯದಲ್ಲಿ, “ರಾಪ್ಚರ್ ಎನ್ನುವುದು ಇತ್ತೀಚೆಗೆ ಕೆಲವರು ಹೇಳಲು ಆರಂಭಿಸಿದ ವಿಷಯ.” ಮತ್ತೊಂದೆಡೆ, “ಈ ಪದವೇ ಬೈಬಲಿನಲ್ಲಿ ಇಲ್ಲವಲ್ಲ!” ಎಂದು ಪ್ರಶ್ನಿಸುವವರೂ ಇದ್ದಾರೆ. ಇಂತಹ ಪ್ರಶ್ನೆಗಳು ಸಹಜವೇ. ಆದರೆ ಒಂದು ವಿಷಯವನ್ನು ನೆನಪಿಡೋಣ.

ಒಂದು ಪದ ಬೈಬಲಿನಲ್ಲಿ ಇಲ್ಲವೆಂದರೆ, ಅದು ಸೂಚಿಸುವ ಸತ್ಯವೂ ಇಲ್ಲ ಎಂದರ್ಥವಲ್ಲ. ಆದರೂ ಅವು ಸೂಚಿಸುವ ಸತ್ಯಗಳನ್ನು ಕ್ರೈಸ್ತರು ಬೈಬಲಿನಿಂದಲೇ ಅರ್ಥಮಾಡಿಕೊಂಡಿದ್ದಾರೆ.

ರಾಪ್ಚರ್ ಎನ್ನುವುದು ಬೈಬಲ್ ವಿವರಿಸುವ ಒಂದು ಘಟನೆಯನ್ನು ಸೂಚಿಸಲು ಬಳಸುವ ಪದವಾಗಿದೆ.

ಈ ಬೋಧನೆಯ ಹೃದಯದಲ್ಲಿರುವ ಒಂದು ವಾಗ್ದಾನ

ಯೇಸು ಈ ಲೋಕಕ್ಕೆ ಏಕೆ ಬಂದನು? ಪಾಪಿಗಳಾದ ಮನುಷ್ಯರನ್ನು ರಕ್ಷಿಸಲು. ಶಿಲುಬೆಯಲ್ಲಿ ಸಾಯಲು. ಮೂರನೇ ದಿನದಲ್ಲಿ ಜೀವಂತನಾಗಿ ಎದ್ದು ಬರಲು.

ಆದರೆ… ಅಷ್ಟರಲ್ಲೇ ಆತನ ಕೆಲಸ ಮುಗಿಯಲಿಲ್ಲ. ತನ್ನ ಶಿಷ್ಯರಿಗೆ ಆತನು ಹೇಳಿದ ಒಂದು ಮಾತು ಕ್ರೈಸ್ತರ ನಿರೀಕ್ಷೆಯ ಆಧಾರವಾಗಿದೆ.

” ನಾನು ಹೋಗಿ ನಿಮಗೆ ಸ್ಥಳವನ್ನು ಸಿದ್ಧಮಾಡಿದ ಮೇಲೆ ತಿರಿಗಿ ಬಂದು ನಿಮ್ಮನ್ನು ಕರಕೊಂಡು ಹೋಗಿ ನನ್ನ ಬಳಿಗೆ ಸೇರಿಸಿಕೊಳ್ಳುವೆನು; ಯಾಕಂದರೆ ನಾನಿರುವ ಸ್ಥಳದಲ್ಲಿ ನೀವು ಸಹ ಇರಬೇಕು.” (ಯೋಹಾನ 14:3) ಈ ವಾಕ್ಯದಲ್ಲಿ ಎರಡು ಮುಖ್ಯ ಸಂಗತಿಗಳಿವೆ.

ಮೊದಲನೆಯದು – ಯೇಸು ಮತ್ತೆ ಬರುತ್ತಾನೆ.

ಎರಡನೆಯದು – ಆತನು ತನ್ನವರನ್ನು ತನ್ನ ಬಳಿಗೆ ಸೇರಿಸಿಕೊಳ್ಳುತ್ತಾನೆ.

ಇದನ್ನೇ ಮುಂದೆ ಅಪೋಸ್ತಲನಾದ ಪೌಲನು ಇನ್ನೂ ಸ್ಪಷ್ಟವಾಗಿ ವಿವರಿಸುತ್ತಾನೆ.

ದುಃಖದಲ್ಲಿದ್ದ ಸಭೆಗೆ ಬರೆದ ಪತ್ರ

ಸುಮಾರು ಎರಡು ಸಾವಿರ ವರ್ಷಗಳ ಹಿಂದೆ ಥೆಸಲೊನೀಕ ಪಟ್ಟಣದಲ್ಲಿದ್ದ ವಿಶ್ವಾಸಿಗಳಿಗೆ ಒಂದು ಚಿಂತೆ ಇತ್ತು. ಅವರಲ್ಲಿ ಕೆಲವರು ಕರ್ತನಲ್ಲಿ ನಿದ್ರಿಸಿದ್ದರು.

“ಅವರು ಈಗ ಏನಾಗುತ್ತಾರೆ?”

“ಯೇಸು ಬಂದಾಗ ಅವರಿಗೆ ಅವಕಾಶ ಸಿಗುವುದಿಲ್ಲವೇ?”

“ಜೀವಂತರಾಗಿರುವವರಿಗೆ ಮಾತ್ರವೇ ಆ ಭಾಗ್ಯ ಸಿಗುತ್ತದೆಯೇ?”

ಈ ಪ್ರಶ್ನೆಗಳಿಗೆ ಉತ್ತರವಾಗಿ ಅಪೋಸ್ತಲನಾದ ಪೌಲನು ಒಂದು ಅದ್ಭುತ ಸತ್ಯವನ್ನು ಬರೆದನು.

ಅವನು ಹೇಳಿದ್ದು ಸಂಕ್ಷಿಪ್ತವಾಗಿ ಹೀಗಿದೆ:

• ಕರ್ತನು ಪರಲೋಕದಿಂದ ಬರುತ್ತಾನೆ.
• ಕ್ರಿಸ್ತನಲ್ಲಿ ನಿದ್ರಿಸಿದವರು ಮೊದಲು ಎದ್ದು ಬರುತ್ತಾರೆ.
• ನಂತರ ಜೀವಂತರಾಗಿರುವ ವಿಶ್ವಾಸಿಗಳು ಅವರೊಂದಿಗೆ ಸೇರಿ ಕರ್ತನನ್ನು ಎದುರುಗೊಳ್ಳುವರು.
• ಆ ನಂತರ ಅವರು ಎಂದೆಂದಿಗೂ ಕರ್ತನ ಸಂಗಡ ಇರುವರು.

ಈ ಕಾರಣಕ್ಕಾಗಿಯೇ ಪೌಲನು ಕೊನೆಯಲ್ಲಿ ಹೇಳುತ್ತಾನೆ:

” ಆದಕಾರಣ ಈ ಮಾತುಗಳಿಂದ ಒಬ್ಬರನ್ನೊಬ್ಬರು ಸಂತೈಸಿರಿ.” (1 ಥೆಸಲೊನೀಕದವರಿಗೆ 4:18) ಗಮನಿಸಿ.

ಪೌಲನು ಈ ವಿಷಯವನ್ನು ಬರೆದದ್ದು ಯಾರನ್ನೂ ಹೆದರಿಸಲು ಅಲ್ಲ. ಸಾಂತ್ವನ ನೀಡಲು. ಯಾರಾದರೂ ಕರ್ತನಲ್ಲಿ ನಿದ್ರಿಸಿದರೆ, ಎಲ್ಲವೂ ಮುಗಿದುಹೋಯಿತು ಎಂದು ದುಃಖಿಸಬೇಡಿ. ಕರ್ತನು ತನ್ನವರನ್ನು ಮರೆಯುವುದಿಲ್ಲ.

ಒಂದು ಕ್ಷಣದಲ್ಲಿ…

ಇನ್ನೊಂದು ಪತ್ರದಲ್ಲಿ ಪೌಲನು ಇನ್ನೂ ಆಶ್ಚರ್ಯಕರವಾದ ವಿಷಯವನ್ನು ತಿಳಿಸುತ್ತಾನೆ. ಅವನು ಹೇಳುತ್ತಾನೆ: ” ಒಂದು ಕ್ಷಣದಲ್ಲೇ ರೆಪ್ಪೆ ಬಡಿಯುವಷ್ಟರೊಳಗಾಗಿ…” (1 ಕೊರಿಂಥದವರಿಗೆ 15:52) ಒಮ್ಮೆ ಯೋಚಿಸಿ.

ನೀವು ಕಣ್ಣು ಮಿಟುಕಿಸಲು ಎಷ್ಟು ಸಮಯ ಬೇಕು? ಒಂದು ಕ್ಷಣ. ಅಷ್ಟೇ.

ಬೈಬಲ್ ಹೇಳುವುದು-ದೇವರ ಕಾರ್ಯಕ್ಕೆ ವರ್ಷಗಳು ಬೇಕಾಗುವುದಿಲ್ಲ. ಆ ದಿನ ಎಲ್ಲವೂ ಕ್ಷಣಾರ್ಧದಲ್ಲಿ ನಡೆಯುತ್ತದೆ. ಇದು ಮನುಷ್ಯನ ಕೆಲಸವಲ್ಲ.

ಇದು ದೇವರ ಅದ್ಭುತ ಕಾರ್ಯ.

ಆಗ ಏನಾಗುತ್ತದೆ?

ಬೈಬಲ್ ತಿಳಿಸುವ ಕ್ರಮವನ್ನು ಸರಳವಾಗಿ ನೋಡೋಣ.

1. ಕರ್ತನು ಬರುತ್ತಾನೆ: ಇದು ಮೊದಲನೆಯ ಘಟನೆ. ಯೇಸು ಕೊಟ್ಟ ವಾಗ್ದಾನವನ್ನು ನೆರವೇರಿಸಲು ಬರುತ್ತಾನೆ.
2. ಕರ್ತನಲ್ಲಿ ನಿದ್ರಿಸಿದವರು ಎದ್ದು ಬರುತ್ತಾರೆ: ವಿಶ್ವಾಸದಿಂದ ಈ ಲೋಕವನ್ನು ಬಿಟ್ಟುಹೋದವರು ದೇವರಿಂದ ಮರೆಯಲ್ಪಟ್ಟವರಲ್ಲ. ಅವರನ್ನು ಕರ್ತನು ಜೀವಂತವಾಗಿ ಎಬ್ಬಿಸುತ್ತಾನೆ. ಇದನ್ನೇ ಬೈಬಲ್ ಪುನರುತ್ಥಾನ ಎಂದು ಕರೆಯುತ್ತದೆ.
3. ಜೀವಂತರಾಗಿರುವ ವಿಶ್ವಾಸಿಗಳು ರೂಪಾಂತರಗೊಳ್ಳುತ್ತಾರೆ: ಆ ದಿನ ಜೀವಂತರಾಗಿರುವ ದೇವಜನರಿಗೆ ಮರಣದ ಅನುಭವ ಅಗತ್ಯವಿರುವುದಿಲ್ಲ. ದೇವರು ಅವರನ್ನು ಕ್ಷಣಾರ್ಧದಲ್ಲಿ ರೂಪಾಂತರಗೊಳಿಸುತ್ತಾನೆ. ಈಗಿರುವ ನಶ್ವರ ದೇಹವು ಮಹಿಮೆಯ ದೇಹವಾಗುತ್ತದೆ.
4. ಎಲ್ಲರೂ ಸೇರಿ ಕರ್ತನನ್ನು ಎದುರುಗೊಳ್ಳುವರು: ಇದು ಅತ್ಯಂತ ಸುಂದರವಾದ ಭಾಗ. ಈ ಘಟನೆಯ ಕೇಂದ್ರಬಿಂದು ಆಕಾಶಕ್ಕೆ ಹೋಗುವುದಲ್ಲ. ಯೇಸುವನ್ನು ಭೇಟಿಯಾಗುವುದು. ಇಷ್ಟು ವರ್ಷಗಳಿಂದ ನಂಬಿಕೆಯಿಂದ ಕಾಯುತ್ತಿದ್ದ ಕರ್ತನನ್ನು ಮುಖಾಮುಖಿಯಾಗಿ ನೋಡುವ ಕ್ಷಣ. ಅದೇ ರಾಪ್ಚರಿನ ಮಹಿಮೆ.

ಇದು ಓಡಿ ಹೋಗುವುದಲ್ಲ…

ಕೆಲವರು ತಪ್ಪಾಗಿ ಅರ್ಥಮಾಡಿಕೊಳ್ಳುತ್ತಾರೆ. “ಕ್ರೈಸ್ತರು ಈ ಲೋಕದಿಂದ ತಪ್ಪಿಸಿಕೊಳ್ಳಲು ಕಾಯುತ್ತಿದ್ದಾರೆ” ಎಂದು. ಆದರೆ ಬೈಬಲ್ ಹಾಗೆ ಹೇಳುವುದಿಲ್ಲ.

ರಾಪ್ಚರ್ ಎಂದರೆ ಲೋಕದಿಂದ ಓಡಿಹೋಗುವುದು ಅಲ್ಲ. ಇದು ಒಂದು ಪುನರ್ಮಿಲನ. ಒಬ್ಬ ತಂದೆ ವಿದೇಶಕ್ಕೆ ಹೋಗಿ, ವರ್ಷಗಳ ನಂತರ ತನ್ನ ಮಕ್ಕಳನ್ನು ತನ್ನ ಬಳಿಗೆ ಕರೆಸಿಕೊಳ್ಳುವಂತದ್ದು.

ಒಬ್ಬ ವರ ಮದುವೆಯ ದಿನ ತನ್ನ ವಧುವನ್ನು ಗೌರವದಿಂದ ಕರೆದುಕೊಂಡು ಹೋಗುವಂತದ್ದು. ಅದಕ್ಕಾಗಿಯೇ ಬೈಬಲ್ ಅನೇಕ ಕಡೆಗಳಲ್ಲಿ ಕರ್ತನ ಆಗಮನವನ್ನು ಸಂತೋಷದ ನಿರೀಕ್ಷೆಯಾಗಿ ಚಿತ್ರಿಸುತ್ತದೆ.

ಹಾಗಾದರೆ ಯಾರು ಕರ್ತನನ್ನು ಎದುರುಗೊಳ್ಳುವರು?

ಇದು ಬಹಳ ಮುಖ್ಯವಾದ ಪ್ರಶ್ನೆ. ಕೆಲವರು ಹೀಗೆ ಯೋಚಿಸುತ್ತಾರೆ. “ನಾನು ಒಳ್ಳೆಯ ಮನುಷ್ಯ.” “ನಾನು ಯಾರಿಗೂ ಕೆಡುಕು ಮಾಡಿಲ್ಲ.” “ನಾನು ಧರ್ಮಕಾರ್ಯಗಳನ್ನು ಮಾಡುತ್ತೇನೆ.”

ಆದರೆ ಬೈಬಲ್ ಬೇರೆ ಪ್ರಶ್ನೆಯನ್ನು ಕೇಳುತ್ತದೆ. “ನೀನು ಯೇಸು ಕ್ರಿಸ್ತನನ್ನು ನಂಬಿದ್ದೀಯಾ?” ರಾಪ್ಚರ್‌ನ (ಎತ್ತಲ್ಪಡುವಿಕೆಯಾ) ಆಧಾರ ನಮ್ಮ ಒಳ್ಳೆಯತನವಲ್ಲ. ನಮ್ಮ ಜಾತಿಯೂ ಅಲ್ಲ. ನಮ್ಮ ಕುಟುಂಬವೂ ಅಲ್ಲ. ನಾವು ಯಾವ ಸಭೆಗೆ ಹೋಗುತ್ತೇವೆ ಎಂಬುದೂ ಅಲ್ಲ.

ಬೈಬಲ್ ಹೇಳುವುದು – “ಕ್ರಿಸ್ತನಲ್ಲಿ ಇರುವವರು…” ಅಂದರೆ, ಯೇಸು ಕ್ರಿಸ್ತನಲ್ಲಿ ವಿಶ್ವಾಸವಿಟ್ಟು ಆತನನ್ನು ರಕ್ಷಕನಾಗಿ ಅಂಗೀಕರಿಸಿದವರು.

ರಾಪ್ಚರ್‌ನಲ್ಲಿ ಯಾರು ಸೇರಿಕೊಳ್ಳುವರು? ಇದು ಎರಡನೇ ಆಗಮನವೇ?

ಹಿಂದಿನ ಭಾಗದಲ್ಲಿ ರಾಪ್ಚರ್ ಬಗ್ಗೆ ಬೈಬಲ್ ಹೇಳುವ ಮೂಲ ಸತ್ಯಗಳನ್ನು ನೋಡಿದೆವು. ಈಗ ಸಹಜವಾಗಿ ಎರಡು ಪ್ರಶ್ನೆಗಳು ಮೂಡುತ್ತವೆ.

“ಆ ದಿನ ಯಾರು ಕರ್ತನನ್ನು ಎದುರುಗೊಳ್ಳುವರು?”

“ರಾಪ್ಚರ್ ಮತ್ತು ಯೇಸು ಕ್ರಿಸ್ತನ ಎರಡನೇ ಆಗಮನ ಒಂದೇ ಘಟನೆಯೇ?”

ಈ ಎರಡೂ ಪ್ರಶ್ನೆಗಳಿಗೆ ಉತ್ತರ ತಿಳಿಯಲು ಮತ್ತೆ ಬೈಬಲಿನತ್ತ ನೋಡೋಣ.

ದೇವರು ಹೊರನೋಟವನ್ನು ನೋಡುವುದಿಲ್ಲ

ನಾವು ಮನುಷ್ಯರು ಯಾರನ್ನಾದರೂ ನೋಡಿದಾಗ ಅನೇಕ ವಿಷಯಗಳನ್ನು ಗಮನಿಸುತ್ತೇವೆ. ಅವರು ಯಾವ ಕುಟುಂಬದವರು? ಯಾವ ಧರ್ಮದವರು? ಎಷ್ಟು ವಿದ್ಯಾವಂತರಿದ್ದಾರೆ?

ಎಷ್ಟು ಒಳ್ಳೆಯ ಕೆಲಸ ಮಾಡಿದ್ದಾರೆ? ಸಮಾಜದಲ್ಲಿ ಅವರಿಗೆ ಎಷ್ಟು ಗೌರವ ಇದೆ? ಆದರೆ ದೇವರು ಮನುಷ್ಯನನ್ನು ನೋಡುವ ದೃಷ್ಟಿ ಬೇರೆ. ಬೈಬಲ್ ಅನೇಕ ಕಡೆಗಳಲ್ಲಿ ದೇವರು ಹೃದಯವನ್ನು ನೋಡುವಾತನು ಎಂದು ತಿಳಿಸುತ್ತದೆ.

ಆದ್ದರಿಂದ ರಾಪ್ಚರ್‌ನ (ಎತ್ತಲ್ಪಡುವಿಕೆಯ) ಪ್ರಶ್ನೆ ಬಂದಾಗ, ಬೈಬಲ್ ಮೊದಲು ಕೇಳುವುದು:

“ನಿನ್ನ ಜೀವನದಲ್ಲಿ ಯೇಸು ಕ್ರಿಸ್ತನಿಗೆ ಯಾವ ಸ್ಥಾನವಿದೆ?”

ಒಳ್ಳೆಯವನಾಗಿರುವುದೇ ಸಾಕೇ?

ಈ ಪ್ರಶ್ನೆಯನ್ನು ಅನೇಕರು ಕೇಳುತ್ತಾರೆ. “ನಾನು ಯಾರಿಗೂ ಕೆಡುಕು ಮಾಡಿಲ್ಲ.” “ನಾನು ಬಡವರಿಗೆ ಸಹಾಯ ಮಾಡುತ್ತೇನೆ.” “ನಾನು ಪ್ರಾಮಾಣಿಕವಾಗಿ ಬದುಕುತ್ತೇನೆ.” ಇವೆಲ್ಲವೂ ಒಳ್ಳೆಯ ಸಂಗತಿಗಳೇ. ಸಮಾಜಕ್ಕೂ ಇಂತಹ ಜನರು ಬೇಕು.

ಆದರೆ ಬೈಬಲ್ ಹೇಳುವುದು – ರಕ್ಷಣೆ ನಮ್ಮ ಒಳ್ಳೆಯ ಕೆಲಸಗಳಿಂದ ಸಿಗುವುದಿಲ್ಲ. ಅದು ದೇವರ ಕೃಪೆಯ ವರ.

ಒಬ್ಬ ಮನುಷ್ಯನು ದೇವರ ಬಳಿಗೆ ಬರುವುದು ತನ್ನ ಪುಣ್ಯದಿಂದಲ್ಲ, ಯೇಸು ಕ್ರಿಸ್ತನಲ್ಲಿ ವಿಶ್ವಾಸ ಇಡುವುದರಿಂದ ಎಂದು ಹೊಸ ಒಡಂಬಡಿಕೆ ಪದೇಪದೇ ತಿಳಿಸುತ್ತದೆ.

ಆದ್ದರಿಂದ ರಾಪ್ಚರ್‌ನ (ಎತ್ತಲ್ಪಡುವಿಕೆಯ) ಪ್ರಶ್ನೆಯೂ ಇದೇ ವಿಷಯದೊಂದಿಗೆ ಸಂಬಂಧ ಹೊಂದಿದೆ.

“ಕ್ರಿಸ್ತನಲ್ಲಿ ಇರುವವರು” ಎಂದರೆ ಯಾರು?

ಅಪೋಸ್ತಲನಾದ ಪೌಲನು ಒಂದು ಸುಂದರವಾದ ಪದವನ್ನು ಬಳಸುತ್ತಾನೆ. “ಕ್ರಿಸ್ತನಲ್ಲಿ ಇರುವವರು.” ಇದರ ಅರ್ಥ ಕೇವಲ ಕ್ರೈಸ್ತ ಕುಟುಂಬದಲ್ಲಿ ಹುಟ್ಟಿದವರು ಎಂಬುದಲ್ಲ. ಕೇವಲ ಸಭೆಗೆ ಹೋಗುವವರೂ ಅಲ್ಲ.

ಕೇವಲ ಬೈಬಲ್ ಓದುವವರೂ ಅಲ್ಲ.ಕ್ರಿಸ್ತನಲ್ಲಿ ಇರುವುದು ಎಂದರೆ – ಯೇಸು ಕ್ರಿಸ್ತನನ್ನು ತನ್ನ ರಕ್ಷಕನಾಗಿ ಅಂಗೀಕರಿಸಿ, ಆತನ ಮೇಲೆ ವಿಶ್ವಾಸವಿಟ್ಟು ಬದುಕುವುದು. ಇದು ಒಂದು ಜೀವಂತ ಸಂಬಂಧ. ಒಬ್ಬ ಮಗುವಿಗೆ ತನ್ನ ತಂದೆಯೊಂದಿಗೆ ಇರುವ ಸಂಬಂಧದಂತದ್ದು.

ಅಥವಾ ಕೊಂಬೆಯೊಂದು ಮರಕ್ಕೆ ಅಂಟಿಕೊಂಡಿರುವಂತದ್ದು. ಕೊಂಬೆಗೆ ಜೀವ ಬರುವುದು ಅದು ಮರಕ್ಕೆ ಸೇರಿಕೊಂಡಿರುವುದರಿಂದ. ಅದೇ ರೀತಿ, ವಿಶ್ವಾಸಿಯ ಜೀವವು ಕ್ರಿಸ್ತನಲ್ಲಿದೆ ಎಂದು ಬೈಬಲ್ ಹೇಳುತ್ತದೆ.

ರಾಪ್ಚರ್‌ನಲ್ಲಿ (ಎತ್ತಲ್ಪಡುವಿಕೆಯಲ್ಲಿ) ಯಾರು ಸೇರಿಕೊಳ್ಳುವರು?

ಇದಕ್ಕೆ ಬೈಬಲ್ ಕೊಡುವ ಉತ್ತರ ಸರಳವಾಗಿದೆ. ಕರ್ತನಲ್ಲಿ ನಿದ್ರಿಸಿದವರು ಮತ್ತು ಆತನಲ್ಲಿ ವಿಶ್ವಾಸದಿಂದ ಜೀವಿಸುತ್ತಿರುವವರು. ಇಲ್ಲಿ ಬೈಬಲ್ ಜಾತಿಯನ್ನು ಹೇಳುವುದಿಲ್ಲ. ದೇಶವನ್ನು ಹೇಳುವುದಿಲ್ಲ. ಭಾಷೆಯನ್ನು ಹೇಳುವುದಿಲ್ಲ.

ಸಂಸ್ಕೃತಿಯನ್ನು ಹೇಳುವುದಿಲ್ಲ. ದೇವರ ದೃಷ್ಟಿಯಲ್ಲಿ ಪ್ರತಿಯೊಬ್ಬ ಮನುಷ್ಯನೂ ಅಮೂಲ್ಯ. ಅದಕ್ಕಾಗಿಯೇ ಯೇಸು ಕ್ರಿಸ್ತನ ಸುವಾರ್ತೆ ಎಲ್ಲ ಜನಾಂಗಗಳಿಗೂ ಸಾರಲ್ಪಡುತ್ತದೆ

ಹಾಗಾದರೆ ದೇವರು ಪಕ್ಷಪಾತಿಯೇ?

ಈ ಪ್ರಶ್ನೆಯನ್ನು ಅನೇಕರು ಕೇಳುತ್ತಾರೆ. “ಒಳ್ಳೆಯ ಮನಸ್ಸಿನಿಂದ ಬದುಕುವ ಬೇರೆ ಧರ್ಮದ ಜನರ ಬಗ್ಗೆ ಏನು?” ಇದು ಹಗುರವಾಗಿ ಉತ್ತರಿಸಬೇಕಾದ ಪ್ರಶ್ನೆಯಲ್ಲ. ಬೈಬಲ್ ಎರಡು ಸತ್ಯಗಳನ್ನು ಒಟ್ಟಿಗೆ ಹೇಳುತ್ತದೆ.

ಮೊದಲನೆಯದು: ದೇವರು ಎಲ್ಲರನ್ನು ಪ್ರೀತಿಸುತ್ತಾನೆ. ಆದ್ದರಿಂದಲೇ ಯೇಸು ಲೋಕಕ್ಕಾಗಿ ಬಂದನು.

ಎರಡನೆಯದು: ಪ್ರತಿಯೊಬ್ಬರಿಗೂ ರಕ್ಷಣೆಯ ಮಾರ್ಗವನ್ನು ಯೇಸು ಕ್ರಿಸ್ತನಲ್ಲಿ ತೆರೆದಿದ್ದಾನೆ. ಆದ್ದರಿಂದ ಕ್ರೈಸ್ತರು ಯಾರನ್ನೂ ತೀರ್ಪು ಮಾಡುವವರಲ್ಲ.

ತೀರ್ಪು ದೇವರದ್ದು. ನಮ್ಮ ಕರ್ತವ್ಯ ಸತ್ಯವನ್ನು ಪ್ರೀತಿಯಿಂದ ಹಂಚಿಕೊಳ್ಳುವುದು. ಯಾರು ರಕ್ಷಣೆ ಹೊಂದುವರು ಎಂಬ ಅಂತಿಮ ನಿರ್ಣಯ ದೇವರ ಕೈಯಲ್ಲಿದೆ.

ಎತ್ತಲ್ಪಡುವಿಕೆ ಮತ್ತು ಎರಡನೇ ಆಗಮನ ಒಂದೇ ಘಟನೆಯೇ?

ಇದು ಶತಮಾನಗಳಿಂದ ಕ್ರೈಸ್ತರಲ್ಲಿ ಚರ್ಚೆಯಾಗುತ್ತಿರುವ ಪ್ರಶ್ನೆ. ಕೆಲವರು ಹೇಳುತ್ತಾರೆ – ರಾಪ್ಚರ್ ಮೊದಲು ನಡೆಯುತ್ತದೆ. ನಂತರ ಎರಡನೇ ಆಗಮನ. ಇನ್ನೂ ಕೆಲವರು ಹೇಳುತ್ತಾರೆ – ಇವೆರಡೂ ಒಂದೇ ಘಟನೆಯ ಎರಡು ವಿವರಣೆಗಳು. ಮತ್ತೊಬ್ಬರು ಬೇರೆ ರೀತಿಯಲ್ಲಿ ವಿವರಿಸುತ್ತಾರೆ.

ಹಾಗಾದರೆ… ಬೈಬಲ್ ಎಲ್ಲರಿಗೂ ಸ್ಪಷ್ಟವಾಗಿ ಹೇಳುವ ಸತ್ಯ ಯಾವುದು? ಅದು ಇದಾಗಿದೆ – ಯೇಸು ಕ್ರಿಸ್ತನು ಮತ್ತೆ ಬರುತ್ತಾನೆ. ಈ ವಿಷಯದಲ್ಲಿ ಕ್ರೈಸ್ತರಲ್ಲಿ ಭಿನ್ನಾಭಿಪ್ರಾಯವಿಲ್ಲ. ವ್ಯತ್ಯಾಸ ಇರುವುದು “ಯಾವಾಗ?” ಮತ್ತು “ಯಾವ ಕ್ರಮದಲ್ಲಿ?” ಎಂಬ ವಿಷಯದಲ್ಲಿ.

ಕ್ರೈಸ್ತರಲ್ಲಿ ಇರುವ ಮೂರು ಪ್ರಮುಖ ಅಭಿಪ್ರಾಯಗಳು

ಇದನ್ನು ತಿಳಿದುಕೊಳ್ಳುವುದು ಒಳ್ಳೆಯದು. ಯಾಕೆಂದರೆ ನಾವು ನಮ್ಮ ಅಭಿಪ್ರಾಯವನ್ನು ಮಾತ್ರ ಸತ್ಯ ಎಂದು ಹೇಳದೆ, ಇತರ ವಿಶ್ವಾಸಿಗಳನ್ನೂ ಗೌರವದಿಂದ ಅರ್ಥಮಾಡಿಕೊಳ್ಳಬೇಕು.

1. ಮಹಾಸಂಕಟಕಾಲಕ್ಕೆ (Great Tribulation) ಮುಂಚೆ: ಈ ಅಭಿಪ್ರಾಯದವರು, ಮಹಾ ಸಂಕಟ ಆರಂಭವಾಗುವ ಮೊದಲು ಕರ್ತನು ತನ್ನ ಸಭೆಯನ್ನು ತನ್ನ ಬಳಿಗೆ ಸೇರಿಸಿಕೊಳ್ಳುತ್ತಾನೆ ಎಂದು ನಂಬುತ್ತಾರೆ.
2. ಮಹಾಸಂಕಟಕಾಲಕ್ಕೆ (Great Tribulation) ಮಧ್ಯದಲ್ಲಿ: ಈ ಅಭಿಪ್ರಾಯದ ಪ್ರಕಾರ, ವಿಶ್ವಾಸಿಗಳು ಸಂಕಟದ ಒಂದು ಭಾಗವನ್ನು ಎದುರಿಸಿದ ನಂತರ ಕರ್ತನನ್ನು ಎದುರುಗೊಳ್ಳುವರು.
3. ಮಹಾಸಂಕಟಕಾಲಕ್ಕೆ (Great Tribulation) ನಂತರ: ಈ ಅಭಿಪ್ರಾಯದವರು, ವಿಶ್ವಾಸಿಗಳು ಸಂಪೂರ್ಣ ಸಂಕಟದ ಅವಧಿಯನ್ನು ದಾಟಿ, ನಂತರ ಕರ್ತನನ್ನು ಎದುರುಗೊಳ್ಳುವರು ಎಂದು ನಂಬುತ್ತಾರೆ.

ಹಾಗಾದರೆ ಯಾವುದು ಸರಿ?

ಈ ಪ್ರಶ್ನೆಗೆ ಈ ಲೇಖನ ಒಂದು ನಿರ್ದಿಷ್ಟ ಪಂಥದ ಪರವಾಗಿ ಉತ್ತರ ನೀಡುವುದಿಲ್ಲ. ಯಾಕೆಂದರೆ ಪ್ರಾಮಾಣಿಕ ಬೈಬಲ್ ಅಧ್ಯಯನ ಮಾಡುವ ದೇವಭಕ್ತರು ಈ ವಿಷಯದಲ್ಲಿ ವಿಭಿನ್ನ ಅಭಿಪ್ರಾಯ ಹೊಂದಿದ್ದಾರೆ.

ಆದರೆ ಅವರು ಎಲ್ಲರೂ ಒಪ್ಪುವ ಒಂದು ಸತ್ಯವಿದೆ. ಯೇಸು ಕ್ರಿಸ್ತನು ಖಂಡಿತವಾಗಿ ಮತ್ತೆ ಬರುತ್ತಾನೆ.

ಆತನಲ್ಲಿ ನಂಬಿಕೆ ಇಟ್ಟವರನ್ನು ಆತನು ಕೈಬಿಡುವುದಿಲ್ಲ. ಆದ್ದರಿಂದ ಕ್ರೈಸ್ತ ಜೀವನದ ಮುಖ್ಯ ಉದ್ದೇಶ – ರಾಪ್ಚರ್ ಯಾವ ದಿನ ನಡೆಯುತ್ತದೆ ಎಂದು ಲೆಕ್ಕ ಹಾಕುವುದು ಅಲ್ಲ. ಕರ್ತನ ಆಗಮನಕ್ಕೆ ಸಿದ್ಧರಾಗಿ ಬದುಕುವುದು.

ದಿನಾಂಕ ಹೇಳುವವರನ್ನು ನಂಬಬೇಕೇ?

ಇತಿಹಾಸದಲ್ಲಿ ಅನೇಕರು, “ಕರ್ತನು ಈ ದಿನ ಬರುತ್ತಾನೆ” ಎಂದು ದಿನಾಂಕ ಹೇಳಿದ್ದಾರೆ. ಆ ದಿನ ಬಂದಿದೆ. ಹೋಗಿದೆ. ಆದರೆ ಯೇಸು ಬಂದಿಲ್ಲ.

ಯಾಕೆ? ಯಾಕೆಂದರೆ ಯೇಸು ಸ್ವತಃ ಹೇಳಿದನು: ” ಆ ಗಳಿಗೆಯ ವಿಷಯವೂ ನನ್ನ ತಂದೆಯೊಬ್ಬನಿಗೆ ತಿಳಿಯುವದೇ ಹೊರತು ಮತ್ತಾರಿಗೂ ತಿಳಿಯದು;” (ಮತ್ತಾಯ 24:36) ಆದ್ದರಿಂದ ಯಾವ ವ್ಯಕ್ತಿಯೇ ಆಗಲಿ, ಯಾವ ಸಂಘಟನೆಯೇ ಆಗಲಿ, ಯಾವ ಯೂಟ್ಯೂಬ್ ಚಾನಲ್ ಆಗಲಿ,

“ರಾಪ್ಚರ್ ಈ ದಿನವೇ ನಡೆಯುತ್ತದೆ” ಎಂದು ಹೇಳಿದರೆ, ಅದನ್ನು ಎಚ್ಚರಿಕೆಯಿಂದ ಪರಿಶೀಲಿಸಬೇಕು. ಬೈಬಲ್ ನಮ್ಮನ್ನು ಕುತೂಹಲದಿಂದಲ್ಲ, ಜಾಗರೂಕತೆಯಿಂದ ಬದುಕಲು ಕರೆಯುತ್ತದೆ.

ಯೇಸು ಹೇಳಿದ ಎಚ್ಚರಿಕೆ – ಭಯಪಡಬೇಡಿ… ಆದರೆ ಸಿದ್ಧರಾಗಿರಿ!

ಇಲ್ಲಿಯವರೆಗೆ ನಾವು ರಾಪ್ಚರ್ ಬಗ್ಗೆ ಬೈಬಲ್ ಏನು ಹೇಳುತ್ತದೆ ಎಂಬುದನ್ನು ನೋಡಿದೆವು. ಆದರೆ ಇನ್ನೊಂದು ಮುಖ್ಯ ಪ್ರಶ್ನೆ ಉಳಿದಿದೆ. “ಇದು ಯಾವಾಗ ನಡೆಯುತ್ತದೆ?” ಇದು ಎರಡು ಸಾವಿರ ವರ್ಷಗಳಿಂದ ಕೇಳಲಾಗುತ್ತಿರುವ ಪ್ರಶ್ನೆ. ಇಂದಿಗೂ ಇದೇ ಪ್ರಶ್ನೆ ಕೇಳಲಾಗುತ್ತಿದೆ.

ಯೂಟ್ಯೂಬ್‌ನಲ್ಲಿ ನೋಡಿ. ಸಾಮಾಜಿಕ ಜಾಲತಾಣಗಳಲ್ಲಿ ನೋಡಿ. “ಈ ವರ್ಷವೇ ಲೋಕಾಂತ್ಯ!” “ಈ ತಿಂಗಳಲ್ಲೇ ಕರ್ತನು ಬರುತ್ತಾನೆ!” “ಈ ಘಟನೆಯೇ ಬೈಬಲ್ ಹೇಳಿದ ಸೂಚನೆ!”

ಇಂತಹ ಅನೇಕ ವಿಡಿಯೋಗಳು ಮತ್ತು ಸಂದೇಶಗಳು ಹರಿದಾಡುತ್ತಿರುತ್ತವೆ. ಇವುಗಳನ್ನು ನೋಡಿದಾಗ ಕೆಲವರಿಗೆ ಭಯವಾಗುತ್ತದೆ. ಇನ್ನೂ ಕೆಲವರು ಗೊಂದಲಕ್ಕೊಳಗಾಗುತ್ತಾರೆ. ಆದರೆ…

ಈ ಪ್ರಶ್ನೆಗೆ ಯೇಸು ಸ್ವತಃ ಏನು ಉತ್ತರ ಕೊಟ್ಟನು? “ಆ ದಿನ ಯಾರಿಗೂ ತಿಳಿಯದು”

ಶಿಷ್ಯರು ಯೇಸುವನ್ನು ಕೇಳಿದರು. “ಕರ್ತನೇ, ಇವೆಲ್ಲಾ ಯಾವಾಗ ನಡೆಯುತ್ತವೆ?” ಯೇಸು ಅವರಿಗೆ ದಿನಾಂಕ ಹೇಳಲಿಲ್ಲ. ಬದಲಾಗಿ ಹೀಗೆ ಹೇಳಿದನು.

“ ಇದಲ್ಲದೆ ಆ ದಿನದ ವಿಷಯವೂ ಆ ಗಳಿಗೆಯ ವಿಷಯವೂ ನನ್ನ ತಂದೆಯೊಬ್ಬನಿಗೆ ತಿಳಿಯುವದೇ ಹೊರತು ಮತ್ತಾರಿಗೂ ತಿಳಿಯದು; ಪರಲೋಕದಲ್ಲಿರುವ ದೂತರಿಗೂ ತಿಳಿಯದು, ಮಗನಿಗೂ ತಿಳಿಯದು. ” (ಮತ್ತಾಯ 24:36)

ಈ ಒಂದು ವಾಕ್ಯ ಸಾಕು. ಇದಾದ ನಂತರ ಯಾರಾದರೂ, “ಕರ್ತನು ಈ ದಿನ ಬರುತ್ತಾನೆ” ಎಂದು ಹೇಳಿದರೆ, ಅದು ಯೇಸುವಿನ ಬೋಧನೆಗೆ ವಿರುದ್ಧವಾಗಿದೆ. ಯೇಸು ನಮಗೆ ದಿನಾಂಕ ಕೊಡಲಿಲ್ಲ. ಆತನು ಕೊಟ್ಟದ್ದು ಸಿದ್ಧತೆಯ ಕರೆಯೇ ಹೊರತು, ದಿನಾಂಕವಲ್ಲ.

ಹಾಗಾದರೆ ಸೂಚನೆಗಳನ್ನು ಏಕೆ ಕೊಟ್ಟನು?

ಯೇಸು ಹೇಳಿದ ಮಾತುಗಳಲ್ಲಿ ಒಂದು ಸುಂದರ ಉದಾಹರಣೆ ಇದೆ. ಮಳೆಗಾಲ ಬರುವ ಮೊದಲು ನಾವು ಏನು ನೋಡುತ್ತೇವೆ? ಕಪ್ಪು ಮೋಡಗಳು. ತಂಪಾದ ಗಾಳಿ. ಮಳೆಯ ವಾಸನೆ. ಇವುಗಳನ್ನು ನೋಡಿದರೆ ಕ್ಯಾಲೆಂಡರ್ ಬೇಕಾಗುವುದಿಲ್ಲ.

“ಮಳೆ ಬರುತ್ತಿದೆ” ಎಂದು ನಮಗೆ ಗೊತ್ತಾಗುತ್ತದೆ. ಅದೇ ರೀತಿ, ಯೇಸು ಕೂಡ ಹೇಳಿದನು – ಜಗತ್ತಿನಲ್ಲಿ ಕೆಲವು ಘಟನೆಗಳು ನಡೆಯುತ್ತವೆ.

ಅವುಗಳನ್ನು ನೋಡಿ, “ದೇವರ ಯೋಜನೆ ತನ್ನ ಅಂತಿಮ ಘಟ್ಟದ ಕಡೆಗೆ ಸಾಗುತ್ತಿದೆ” ಎಂದು ಅರಿತುಕೊಳ್ಳಬಹುದು. ಆದರೆ… ಅವುಗಳಿಂದ ದಿನಾಂಕ ಹೇಳಲು ಸಾಧ್ಯವಿಲ್ಲ.

ಯೇಸು ಹೇಳಿದ ಕೆಲವು ಸೂಚನೆಗಳು

ಮತ್ತಾಯ 24, ಮಾರ್ಕ 13 ಮತ್ತು ಲೂಕ 21 ಅಧ್ಯಾಯಗಳಲ್ಲಿ ಯೇಸು ಕೆಲವು ಸಂಗತಿಗಳನ್ನು ತಿಳಿಸಿದನು.

• ಯುದ್ಧಗಳು ಮತ್ತು ಯುದ್ಧದ ಸುದ್ದಿಗಳು.
• ಭೂಕಂಪಗಳು.
• ಬರಗಾಲಗಳು.
• ರೋಗಗಳು.
• ಮೋಸಗೊಳಿಸುವ ಸುಳ್ಳು ಬೋಧಕರು.
• ಪ್ರೀತಿಯು ಕಡಿಮೆಯಾಗುವುದು.
• ಅನ್ಯಾಯ ಹೆಚ್ಚಾಗುವುದು.
• ದೇವರ ರಾಜ್ಯದ ಸುವಾರ್ತೆ ಲೋಕದಾದ್ಯಂತ ಸಾರಲ್ಪಡುವುದು.

ಒಮ್ಮೆ ಯೋಚಿಸಿ. ಇವುಗಳಲ್ಲಿ ಕೆಲವು ಸಂಗತಿಗಳನ್ನು ನಾವು ಇಂದಿನ ಜಗತ್ತಿನಲ್ಲಿಯೂ ನೋಡುತ್ತಿದ್ದೇವೆಯೇ? ಹೌದು. ಆದರೆ… ಒಂದು ವಿಷಯವನ್ನು ಮರೆಯಬಾರದು. ಈ ರೀತಿಯ ಘಟನೆಗಳು ಇತಿಹಾಸದ ವಿವಿಧ ಕಾಲಗಳಲ್ಲಿಯೂ ನಡೆದಿವೆ.

ಆದ್ದರಿಂದ ಪ್ರತಿಯೊಂದು ಘಟನೆಯನ್ನೂ ನೋಡಿ, “ಇದೇ ಕೊನೆಯ ದಿನ” ಎಂದು ಹೇಳುವುದು ಸರಿಯಲ್ಲ. ಯೇಸು ಹೇಳಿದ್ದು – ಜಾಗರೂಕರಾಗಿರಿ. ಆದರೆ… ಭಯಪಡಬೇಡಿ.

ಹತ್ತು ಕನ್ಯೆಯರ ಸಾಮ್ಯ

ಕೊನೆಯ ದಿನಗಳ ಬಗ್ಗೆ ಯೇಸು ಹೇಳಿದ ಅತ್ಯಂತ ಪ್ರಸಿದ್ಧ ಸಾಮ್ಯಗಳಲ್ಲಿ ಒಂದು ಹತ್ತು ಕನ್ಯೆಯರ ಸಾಮ್ಯ. ಹತ್ತು ಕನ್ಯೆಯರು ಮದುವೆಯ ವರನನ್ನು ಎದುರು ನೋಡುತ್ತಿದ್ದರು. ಎಲ್ಲರ ಕೈಯಲ್ಲೂ ದೀಪಗಳಿದ್ದವು.

ಆದರೆ ಐದು ಜನ ಮಾತ್ರ ಹೆಚ್ಚುವರಿ ಎಣ್ಣೆಯನ್ನು ತೆಗೆದುಕೊಂಡಿದ್ದರು. ಉಳಿದ ಐದು ಜನ ತೆಗೆದುಕೊಂಡಿರಲಿಲ್ಲ. ವರನು ತಡವಾಗಿ ಬಂದನು. ಎಲ್ಲರೂ ನಿದ್ರಿಸಿದರು. ಇದ್ದಕ್ಕಿದ್ದಂತೆ ಮಧ್ಯರಾತ್ರಿಯಲ್ಲಿ ಕೂಗು ಕೇಳಿಸಿತು.

“ಇಗೋ, ಮದಲಿಂಗನು ಬಂದನು!” ಸಿದ್ಧರಾಗಿದ್ದ ಐದು ಜನರು ಮದಲಿಂಗನೊಂದಿಗೆ ಒಳಗೆ ಹೋದರು. ಸಿದ್ಧರಾಗಿರದವರು ಎಣ್ಣೆ ಹುಡುಕಲು ಓಡಿದರು. ಅವರು ಹಿಂದಿರುಗುವಷ್ಟರಲ್ಲಿ ಬಾಗಿಲು ಮುಚ್ಚಲ್ಪಟ್ಟಿತ್ತು. ಈ ಕಥೆಯ ಕೊನೆಯಲ್ಲಿ ಯೇಸು ಹೇಳಿದ ಮಾತು ಬಹಳ ಸರಳ.

“ಆದಕಾರಣ ಆ ದಿನವಾದರೂ ಗಳಿಗೆಯಾದರೂ ನಿಮಗೆ ಗೊತ್ತಿಲ್ಲವಾದದರಿಂದ ಎಚ್ಚರವಾಗಿರ್ರಿ.” (ಮತ್ತಾಯ 25:13)

ಈ ಕಥೆ ನಮಗೆ ಏನು ಕಲಿಸುತ್ತದೆ?

ಗಮನಿಸಿ. ಯೇಸು ಈ ಕಥೆಯಲ್ಲಿ, “ಐದು ಜನರು ತುಂಬಾ ಕೆಟ್ಟವರಾಗಿದ್ದರು” ಎಂದು ಹೇಳಲಿಲ್ಲ. ಅವರ ತಪ್ಪೇನು? ಅವರು ಸಿದ್ಧರಾಗಿರಲಿಲ್ಲ. ಅವರಿಗೆ ಇನ್ನೂ ಸಮಯ ಇದೆ ಎಂದು ಅನಿಸಿತು.

“ನಂತರ ನೋಡೋಣ.” “ಇನ್ನೂ ಸಮಯ ಇದೆ.” “ಮುಂದೆ ದೇವರ ವಿಷಯ ಯೋಚಿಸೋಣ.” ಎಂದುಕೊಂಡರು. ಆದರೆ ಅವಕಾಶ ಯಾವಾಗಲೂ ಕಾಯುವುದಿಲ್ಲ. ಇದೇ ಈ ಸಾಮ್ಯದ ಮುಖ್ಯ ಸಂದೇಶ.

ರಾಪ್ಚರ್ (ಎತ್ತಲ್ಪಡುವಿಕೆ) ಬಗ್ಗೆ ತಿಳಿದುಕೊಳ್ಳುವುದೇ ಸಾಕೇ?

ಒಬ್ಬ ವಿದ್ಯಾರ್ಥಿ ಪರೀಕ್ಷೆಯ ದಿನಾಂಕವನ್ನು ಚೆನ್ನಾಗಿ ತಿಳಿದಿದ್ದಾನೆ ಎಂದುಕೊಳ್ಳಿ. ಆದರೆ ಓದುವುದೇ ಇಲ್ಲ. ಅವನಿಗೆ ದಿನಾಂಕ ಗೊತ್ತಿರುವುದರಿಂದ ಪ್ರಯೋಜನವಿದೆಯೇ? ಇಲ್ಲ.

ಅದೇ ರೀತಿ, ರಾಪ್ಚರ್ ಬಗ್ಗೆ ಪುಸ್ತಕಗಳನ್ನು ಓದುವುದು, ಯೂಟ್ಯೂಬ್ ವಿಡಿಯೋಗಳನ್ನು ನೋಡುವುದು, ಚರ್ಚೆ ಮಾಡುವುದು… ಇವೆಲ್ಲವೂ ಒಳ್ಳೆಯದೇ. ಆದರೆ ಯೇಸು ಕೇಳುವ ಪ್ರಶ್ನೆ ಬೇರೆ.

“ನೀನು ನನ್ನೊಂದಿಗೆ ನಡೆಯುತ್ತಿದ್ದೀಯಾ?” ಜ್ಞಾನಕ್ಕಿಂತ ಸಂಬಂಧ ಮುಖ್ಯ. ಮಾಹಿತಿಗಿಂತ ವಿಶ್ವಾಸ ಮುಖ್ಯ. ವಾದಕ್ಕಿಂತ ವಿಧೇಯತೆ ಮುಖ್ಯ.

ನಾವು ಹೇಗೆ ಸಿದ್ಧರಾಗಬೇಕು?

ಸಿದ್ಧತೆ ಎಂದರೆ ಆಹಾರ ಸಂಗ್ರಹಿಸುವುದಲ್ಲ. ಗುಡ್ಡಗಳಿಗೆ ಓಡುವುದಲ್ಲ. ದಿನಾಂಕ ಲೆಕ್ಕ ಹಾಕುವುದಲ್ಲ. ಬೈಬಲ್ ಹೇಳುವ ಸಿದ್ಧತೆ ತುಂಬಾ ಸರಳ.

• ಪ್ರತಿದಿನ ದೇವರೊಂದಿಗೆ ನಡೆಯುವುದು.
• ಪ್ರಾರ್ಥನೆಯ ಜೀವನ.
• ದೇವರ ವಾಕ್ಯವನ್ನು ಓದುವುದು.
• ಪ್ರೀತಿಯಿಂದ ಬದುಕುವುದು.
• ಇತರರನ್ನು ಕ್ಷಮಿಸುವುದು.
• ನ್ಯಾಯವಾಗಿ ನಡೆಯುವುದು.
• ಕ್ರಿಸ್ತನಲ್ಲಿ ನಿರೀಕ್ಷೆಯಿಡುವುದು.

ಯೇಸು ಬಯಸಿದ್ದು ಇದೇ.

ಭಯವೇ? ಅಥವಾ ನಿರೀಕ್ಷೆಯೇ?

ರಾಪ್ಚರ್ ಬಗ್ಗೆ ಮಾತನಾಡಿದಾಗ ಕೆಲವರಿಗೆ ಭಯವಾಗುತ್ತದೆ. ಆದರೆ ಹೊಸ ಒಡಂಬಡಿಕೆಯಲ್ಲಿ ಈ ಬೋಧನೆಯ ಉದ್ದೇಶ ಭಯ ಹುಟ್ಟಿಸುವುದಲ್ಲ. ಇದು ನಿರೀಕ್ಷೆಯ ಸಂದೇಶ.

ಒಬ್ಬ ಮಗು ತನ್ನ ತಂದೆ ವಿದೇಶದಿಂದ ಮನೆಗೆ ಬರುವ ದಿನಕ್ಕಾಗಿ ಕಾಯುವಂತೆ… ಒಬ್ಬ ವಧು ತನ್ನ ವರನಿಗಾಗಿ ಕಾಯುವಂತೆ… ವಿಶ್ವಾಸಿಯೂ ತನ್ನ ಕರ್ತನ ಆಗಮನಕ್ಕಾಗಿ ಸಂತೋಷದಿಂದ ಕಾಯುತ್ತಾನೆ. ಇದು ಭಯದ ನಿರೀಕ್ಷೆಯಲ್ಲ. ಪ್ರೀತಿಯ ನಿರೀಕ್ಷೆ.

ಎತ್ತಲ್ಪಡುವಿಕೆ | ರಾಪ್ಚರ್ – ಭಯದ ವಿಷಯವಲ್ಲ, ನಿರೀಕ್ಷೆಯ ವಿಷಯ

ಇಲ್ಲಿಯವರೆಗೆ ನಾವು ರಾಪ್ಚರ್ ಕುರಿತು ಬೈಬಲ್ ಹೇಳುವ ಅನೇಕ ವಿಷಯಗಳನ್ನು ನೋಡಿದೆವು.

• ರಾಪ್ಚರ್ ಎಂದರೇನು?
• ಅದು ಬೈಬಲಿನ ಬೋಧನೆಯೇ?
• ಯಾರು ಕರ್ತನನ್ನು ಎದುರುಗೊಳ್ಳುವರು?
• ಅದು ಯಾವಾಗ ನಡೆಯುತ್ತದೆ?
• ಯಾಕೆ ಯೇಸು “ಸಿದ್ಧರಾಗಿರಿ” ಎಂದು ಹೇಳಿದನು?

ಈಗ ಕೊನೆಯದಾಗಿ ಒಂದು ಪ್ರಶ್ನೆಯನ್ನು ಕೇಳೋಣ. ಈ ಬೋಧನೆಯಿಂದ ನನ್ನ ಜೀವನದಲ್ಲಿ ಏನು ಬದಲಾವಣೆ ಆಗಬೇಕು?

ಪ್ರತಿಯೊಂದು ಸುದ್ದಿಯೂ ಪ್ರವಾದನೆಯೇ?

ಇಂದು ಮೊಬೈಲ್ ತೆರೆದರೆ ಸಾಕು. ಒಂದು ದೇಶದಲ್ಲಿ ಯುದ್ಧ. ಮತ್ತೊಂದು ಕಡೆ ಭೂಕಂಪ. ಇನ್ನೊಂದು ಕಡೆ  ನೆರೆಹಾವಳಿ. ಹೊಸ ರೋಗ. ಆರ್ಥಿಕ ಸಂಕಷ್ಟ. ಕೆಲವರು ಕೂಡಲೇ ಹೇಳುತ್ತಾರೆ.

“ಇದೋ… ಇದೇ ಬೈಬಲ್ ಹೇಳಿದ ಕೊನೆಯ ದಿನ!” ಆದರೆ ಸ್ವಲ್ಪ ತಾಳ್ಮೆಯಿಂದ ಯೋಚಿಸೋಣ. ಇತಿಹಾಸವನ್ನು ನೋಡಿದರೆ… ಮೊದಲನೆಯ ಶತಮಾನದಲ್ಲಿಯೂ ಯುದ್ಧಗಳಿದ್ದವು. ಮಧ್ಯಯುಗದಲ್ಲಿಯೂ ಸಾಂಕ್ರಾಮಿಕ ರೋಗಗಳಿದ್ದವು.

ಎರಡು ಮಹಾಯುದ್ಧಗಳಲ್ಲಿ ಕೋಟ್ಯಾಂತರ ಜನರು ಮೃತಪಟ್ಟರು. ಭೂಕಂಪಗಳು, ಬರಗಾಲಗಳು, ಅನ್ಯಾಯಗಳು ಎಲ್ಲ ಕಾಲದಲ್ಲಿಯೂ ನಡೆದಿವೆ. ಹಾಗಾದರೆ ಯೇಸು ಹೇಳಿದ ಸೂಚನೆಗಳ ಅರ್ಥವೇನು?

ಅವು ದಿನಾಂಕ ತಿಳಿಯಲು ಕೊಟ್ಟ ಗುರುತುಗಳಲ್ಲ. ಅವು ಜಾಗರೂಕರಾಗಿ ಬದುಕಲು ಕೊಟ್ಟ ನೆನಪುಗಳು.

ಇಸ್ರಾಯೇಲ್ ಬಗ್ಗೆ ಯಾಕೆ ಹೆಚ್ಚು ಮಾತನಾಡುತ್ತಾರೆ?

ಕೊನೆಯ ದಿನಗಳ ಬಗ್ಗೆ ಮಾತನಾಡಿದಾಗ ಇಸ್ರಾಯೇಲ್ ದೇಶದ ಹೆಸರೂ ಹೆಚ್ಚಾಗಿ ಕೇಳಿಬರುತ್ತದೆ.

ಬೈಬಲಿನ ಅನೇಕ ಪ್ರವಾದನೆಗಳು ಇಸ್ರಾಯೇಲ್ ಜನಾಂಗದೊಂದಿಗೆ ಸಂಬಂಧ ಹೊಂದಿವೆ. ಆದರೆ ಪ್ರತಿಯೊಂದು  ರಾಜಕೀಯ ಘಟನೆಯನ್ನೂ ಪ್ರವಾದನೆಯೆಂದು ಘೋಷಿಸುವುದು ಸರಿಯಲ್ಲ.

ಇದು ಬೈಬಲ್ ಅಧ್ಯಯನ ಮಾಡುವವರಲ್ಲಿಯೂ ಚರ್ಚೆಯ ವಿಷಯವಾಗಿದೆ. ಆದ್ದರಿಂದ ನಾವು ಮಾಡುವ ಅತ್ಯುತ್ತಮ ಕೆಲಸವೇನೆಂದರೆ— ಬೈಬಲ್ ಹೇಳಿದ್ದನ್ನು ನಂಬುವುದು. ಬೈಬಲ್ ಹೇಳದ ವಿಷಯಗಳ ಬಗ್ಗೆ ಎಚ್ಚರಿಕೆಯಿಂದ ಇರುವುದು.

ಯೇಸು ನಮಗೆ ಯಾವ ಕೆಲಸ ಕೊಟ್ಟಿದ್ದಾನೆ?

ಒಮ್ಮೆ ಯೋಚಿಸಿ. ಯೇಸು ತನ್ನ ಶಿಷ್ಯರಿಗೆ ಕೊನೆಯಾಗಿ ಏನು ಹೇಳಿದನು? “ಕೊನೆಯ ದಿನಗಳ ದಿನಾಂಕ ಲೆಕ್ಕ ಹಾಕಿರಿ” ಎಂದು ಹೇಳಲಿಲ್ಲ. “ಪ್ರತಿಯೊಂದು ಘಟನೆಯ ಬಗ್ಗೆ ವಾದ ಮಾಡಿ” ಎಂದೂ ಹೇಳಲಿಲ್ಲ. ಆತನು ಹೇಳಿದ್ದು: “ಲೋಕದ ಎಲ್ಲಾ ಜನರಿಗೆ ಸುವಾರ್ತೆಯನ್ನು ತಿಳಿಸಿರಿ.”

ಅಂದರೆ… ನಮ್ಮ ಗಮನ ಭವಿಷ್ಯದ ಬಗ್ಗೆ ಭಯಪಡುವುದರಲ್ಲಿ ಇರಬಾರದು. ನಮ್ಮ ಗಮನ ಇಂದಿನ ದಿನ ದೇವರ ಚಿತ್ತದಂತೆ ಬದುಕುವುದರಲ್ಲಿ ಇರಬೇಕು.

ರಾಪ್ಚರ್‌ನ (ಎತ್ತಲ್ಪಡುವಿಕೆಯ) ನಿರೀಕ್ಷೆ ನಮ್ಮನ್ನು ಹೇಗೆ ಬದಲಾಯಿಸಬೇಕು?

ಯಾರಾದರೂ ಗೌರವಾನ್ವಿತ ಅತಿಥಿ ನಮ್ಮ ಮನೆಗೆ ಬರುತ್ತಿದ್ದಾರೆ ಎಂದು ತಿಳಿದರೆ ನಾವು ಏನು ಮಾಡುತ್ತೇವೆ? ಮನೆಯನ್ನು ಸ್ವಚ್ಛಗೊಳಿಸುತ್ತೇವೆ. ಬೇಕಾದ ಸಿದ್ಧತೆ ಮಾಡಿಕೊಳ್ಳುತ್ತೇವೆ.

ಸಂತೋಷದಿಂದ ಕಾಯುತ್ತೇವೆ. ಅದೇ ರೀತಿಯಲ್ಲಿ, ಕರ್ತನ ಆಗಮನದ ನಿರೀಕ್ಷೆ ನಮ್ಮ ಜೀವನದಲ್ಲಿಯೂ ಕೆಲವು ಬದಲಾವಣೆಗಳನ್ನು ತರಬೇಕು. ನಾವು…

• ದೇವರೊಂದಿಗೆ ಇನ್ನೂ ಹತ್ತಿರವಾಗಿ ನಡೆಯಬೇಕು.
• ಕುಟುಂಬದವರನ್ನು ಪ್ರೀತಿಸಬೇಕು.
• ಇತರರನ್ನು ಕ್ಷಮಿಸಬೇಕು.
• ಅನ್ಯಾಯದಿಂದ ದೂರವಿರಬೇಕು.
• ದೇವರ ವಾಕ್ಯವನ್ನು ಓದಬೇಕು.
• ಪ್ರಾರ್ಥನೆಯಲ್ಲಿ ಬೆಳೆಯಬೇಕು.
• ನಿರೀಕ್ಷೆಯನ್ನು ಕಳೆದುಕೊಳ್ಳಬಾರದು.

ಇವು ಭಯದಿಂದ ಮಾಡುವ ಕೆಲಸಗಳಲ್ಲ. ಪ್ರೀತಿಯಿಂದ ಮಾಡುವ ಸಿದ್ಧತೆ.

ಈ ಲೇಖನವನ್ನು ಓದುತ್ತಿರುವ ನಿಮಗಾಗಿ…

ನೀವು ಕ್ರೈಸ್ತರಾಗಿರಬಹುದು. ಅಥವಾ ಯಾವುದೇ ಧರ್ಮವನ್ನು ಅನುಸರಿಸದವರಾಗಿರಬಹುದು. ಈ ಲೇಖನದ ಉದ್ದೇಶ ಯಾರೊಂದಿಗೂ ವಾದ ಮಾಡುವುದಲ್ಲ. ಯಾರನ್ನೂ ಹೆದರಿಸುವುದೂ ಅಲ್ಲ. ಕೇವಲ ಒಂದು ಆಹ್ವಾನ.

“ಬೈಬಲ್ ಈ ವಿಷಯದ ಬಗ್ಗೆ ಏನು ಹೇಳುತ್ತದೆ?” ಎಂಬ ಪ್ರಶ್ನೆಯನ್ನು ನೀವೇ ಸ್ವತಃ ಪರಿಶೀಲಿಸಿ. ಯೇಸು ಅನೇಕ ಜನರನ್ನು  ಬಲವಂತಪಡಿಸಲಿಲ್ಲ.

ಅವನು ಪ್ರಶ್ನೆಗಳನ್ನು ಕೇಳಿದನು. ಕಥೆಗಳನ್ನು ಹೇಳಿದನು. ಸತ್ಯವನ್ನು ವಿವರಿಸಿದನು. ನಂತರ ಪ್ರತಿಯೊಬ್ಬರಿಗೂ ಯೋಚಿಸುವ ಅವಕಾಶ ಕೊಟ್ಟನು. ಇಂದೂ ಆತನು ಅದನ್ನೇ ಮಾಡುತ್ತಿದ್ದಾನೆ.

ಒಂದು ಪ್ರಶ್ನೆ… ನಿಮ್ಮ ಮನಸ್ಸಿನಲ್ಲಿ ಉಳಿಯಲಿ

ಯೇಸು ಕ್ರಿಸ್ತನು ಮತ್ತೆ ಬಂದರೆ… ನೀವು ಆತನನ್ನು ಭೇಟಿಯಾಗಲು ಸಿದ್ಧರಿದ್ದೀರಾ? ಈ ಪ್ರಶ್ನೆಗೆ ಉತ್ತರವನ್ನು ನಿಮ್ಮ ಕುಟುಂಬ ಕೊಡಲಾರದು. ನಿಮ್ಮ ಸ್ನೇಹಿತರು ಕೊಡಲಾರರು.

ನಿಮ್ಮ ಸಭೆಯೂ ಕೊಡಲಾರದು. ಉತ್ತರ ನಿಮ್ಮ ಮತ್ತು ದೇವರ ನಡುವಿನ ವಿಷಯ. ಅದಕ್ಕಾಗಿಯೇ ಯೇಸು ಹೇಳಿದನು:

“ತಂದೆಯು ನನಗೆ ಕೊಡುವಂಥವರೆಲ್ಲರು ನನ್ನ ಬಳಿಗೆ ಬರುವರು; ಮತ್ತು ನನ್ನ ಬಳಿಗೆ ಬರುವವನನ್ನು ನಾನು ತಳ್ಳಿಬಿಡುವದೇ ಇಲ್ಲ.” (ಯೋಹಾನ 6:37)

ಇದು ಕೇವಲ ಕ್ರೈಸ್ತರಿಗಾಗಿ ಮಾತ್ರವಲ್ಲ. ದೇವರನ್ನು ಹುಡುಕುವ ಪ್ರತಿಯೊಬ್ಬರಿಗೂ ತೆರೆದಿರುವ ಆಹ್ವಾನ.

ಭಯಪಡಬೇಡಿ… ನಿರೀಕ್ಷೆಯಿಂದ ಬದುಕಿ

ರಾಪ್ಚರ್ ಬಗ್ಗೆ ಅನೇಕ ಪುಸ್ತಕಗಳು ಬರೆಯಲ್ಪಟ್ಟಿವೆ. ಅನೇಕ ಚರ್ಚೆಗಳು ನಡೆದಿವೆ. ಅನೇಕ ಅಭಿಪ್ರಾಯಗಳಿವೆ. ಆದರೆ ಅವುಗಳ ಮಧ್ಯೆ ಒಂದು ಸತ್ಯ ಮಾತ್ರ ಸ್ಥಿರವಾಗಿದೆ. ಯೇಸು ಕ್ರಿಸ್ತನು ಮತ್ತೆ ಬರುತ್ತಾನೆ. ಅದು ಯಾವಾಗ ಎಂಬುದು ನಮಗೆ ತಿಳಿದಿಲ್ಲ.

ಆದರೆ ಕ್ರಿಸ್ತನು ಮತ್ತೆ ಬರುತ್ತಾನೆ ಎಂಬುದು ವಾಗ್ದಾನ. ಅದಕ್ಕಾಗಿಯೇ ಅಪೋಸ್ತಲನಾದ ಪೌಲನು ರಾಪ್ಚರ್ ಕುರಿತು ಬರೆದ ನಂತರ, “ ಆದಕಾರಣ ಈ ಮಾತುಗಳಿಂದ ಒಬ್ಬರನ್ನೊಬ್ಬರು ಸಂತೈಸಿರಿ.” (1 ಥೆಸಲೊನೀಕದವರಿಗೆ 4:18) ಎಂದು ಹೇಳುತ್ತಾನೆ.

ಗಮನಿಸಿ. ಅವನು ಹೇಳಿದ್ದು: “ಒಬ್ಬರನ್ನೊಬ್ಬರು ಹೆದರಿಸಿರಿ” ಅಲ್ಲ. “ಒಬ್ಬರನ್ನೊಬ್ಬರು ಸಂತೈಸಿರಿ.” ಇದೇ ರಾಪ್ಚರ್‌ನ (ಎತ್ತಲ್ಪಡುವಿಕೆಯಾ) ನಿಜವಾದ ಸಂದೇಶ.

ಸಮಾರೋಪ

ನಾವು ಬದುಕುತ್ತಿರುವ ಲೋಕ ವೇಗವಾಗಿ ಬದಲಾಗುತ್ತಿದೆ. ಮನುಷ್ಯನ ಸಾಧನೆಗಳು ಹೆಚ್ಚುತ್ತಿವೆ. ಆದರೆ ಭಯ, ಏಕಾಂತ, ಅನ್ಯಾಯ ಮತ್ತು ಅನಿಶ್ಚಿತತೆಯೂ ಹೆಚ್ಚುತ್ತಿವೆ.

ಇಂತಹ ಸಮಯದಲ್ಲಿ ಬೈಬಲ್ ನಮಗೆ ಒಂದು ನಿರೀಕ್ಷೆಯನ್ನು ನೀಡುತ್ತದೆ. ಇತಿಹಾಸವು ಗೊತ್ತುಗುರಿಯಿಲ್ಲದೆ ಮುಗಿಯುವುದಿಲ್ಲ. ದೇವರ ಯೋಜನೆಗೆ ಒಂದು ಪೂರ್ಣತೆ ಇದೆ. ಯೇಸು ಕ್ರಿಸ್ತನು ಕೊಟ್ಟ ವಾಗ್ದಾನ ನೆರವೇರುತ್ತದೆ. ಆ ದಿನ ಯಾವಾಗ ಬರುತ್ತದೆ ಎಂಬುದು ನಮಗೆ ತಿಳಿದಿಲ್ಲ.

ಆದರೆ ಆ ದಿನಕ್ಕಾಗಿ ಭಯದಿಂದಲ್ಲ, ವಿಶ್ವಾಸದಿಂದ… ಆತಂಕದಿಂದಲ್ಲ, ನಿರೀಕ್ಷೆಯಿಂದ… ಬದುಕಲು ಬೈಬಲ್ ನಮ್ಮನ್ನು ಕರೆಯುತ್ತದೆ. ಯಾಕೆಂದರೆ ಕ್ರೈಸ್ತ ನಂಬಿಕೆಯ ಕೊನೆಯ ಅಧ್ಯಾಯವು ಕತ್ತಲೆಯಿಂದ ಮುಗಿಯುವುದಿಲ್ಲ. ಅದು ಕರ್ತನೊಂದಿಗೆ ಇರುವ ನಿತ್ಯಜೀವದ ನಿರೀಕ್ಷೆಯಲ್ಲಿ ಮುಕ್ತಾಯವಾಗುತ್ತದೆ.